Quality Control Division tlawh

Public Works Department Minister Vanlalhlana chuan PWD Quality Control, Research and Development Division Zuangtui chu Thawhlehni khan tlawhin hmalakna a enfiah.
PWD minister a nih atangin hna tha leh tlo siam kawnga pawimawh ber ‘quality control’ chu ngaihpawimawh hmasaka a neih thu leh PWD office zinga tlawh hmasak bera a neih chhan pawh a ngaihpawimawh zia lantirna a nih thu Vanlalhlana hian a sawi a. Quality Control, Research & Development Division chu tun aia changtlung, pawimawh leh tha zawka kalpui a duh tih sawiin, thawktu indaihlohna leh mamawh chu a tul dan anga ngaihtuah zel a nih tur thu a sawi.
Inkaihhruaina siamte tha taka zawm chunga sawkar kaltlanga in sak, kawngpui siam leh hnathawh dangte puitlin a nih theih nan theihtawp chhuah a tul tih a sawi a. PWD hmalakna chu quality tha leh tlo, chhawr tlak ngei a nih theih nan thahnemngai taka thawk turin mawhphurtu zawng zawng a fuih a ni.
PWD minister hian in sakna, kawngpui siamna leh PWD kaltlanga hmalakna hrang hranga hmanraw hman thin – cement, balu, lei, iron rod, bitumen, cement mix, building foundation zawh chin leh a dangte endikna hmunpui, central laboratory tlawh nghalin hmalakna a enfiah a. Thawktuten khawl hrang hnathawh dan lo hrilhfiahin mamawh an neih an lo thlen.