Healthcare scheme thar duang Cancer hospital-ah post thar

Mipui huap kim zawk leh bill tam zawk lak theihna tur health care scheme thar duan mek a ni tih Health & Family Welfare minister Lalrinpuii chuan a sawi a. Tangkai zawka Cancer Hospital hmang turin post siam belh tul buaipui mek a ni tih a sawi. Health minister sawi danin, sawrkar laipui ruahman health insurance, ‘Golden Card’ tia sawi chu Mizoramah mi 519150-in an nei a. Hei hian mipui a huam kim loh avangin mipui zawng zawng huap tur ‘Mizoram Universal Health Coverage Scheme’ chu sawrkarin a duang mek.
“Damloten anmahni sum seng loa damdawi ina an inenkawl theihna tur, cashless system-a kalpui a ni anga, hemi atan hian uluk takin sum hmuhna tur, sum hman dan tur, bill theih chin leh, rate bithliah tur hrang hrang zirchian mek a ni,” a ti.
Mizoramah thingtlang lama primary health sector tihchangtlun tumin kum rei tak chhung nasa takin hma lak ni tawh mah se, mipui insenso tamna ber leh state pawnlama sum luanchhuah hnemna ber pakhat chu tertiary health sector – kal thlak, lung thlak, cancer enkawl leh a dangte a ni tih Lalrinpuii hian a sawi.
“Phai damdawi in lian zawkte khawl neih ang kan nei ve tan a, kan doctor-te pawhin phai damdawi in changtlung zawka tih theih ang kha an lo ti thei reng a. Hetiang lama hmasawnna nei tur hian ruahmanna kan siam mek a, nakin lawkah chuan kal thlak, lung zai adt hi Mizo doctor thiamten sawrkar damdawi in ngeiah an tih theih thuai ka beisei,” a ti.
Cancer Hospital Zemabawkah cancer zai theihna bungrua leh doctor an awm vek a; heng hman tangkaina tura pawimawh – hnimhlum petu tur doctor, nurse leh puitu dang atan sawrkarin post siam a phalsak tih sawiin, sawrkar kum kal mek chhung ngeiin post hnawhkhah phalna nei a, Cancer Hospital-a cancer zaina bul tan theih an tum tih a sawi a ni.
Zawhna chhangin Health minister chuan, tuna health care scheme-ah damlo zai ngaite pawhin cheng nuai hnih velte an bill thei hram a, cheng nuai 5 tala bill theihna turin ruahmanna siam an tum tih a sawi.
State health care scheme kalpui meka damlo bill ba pekna tur, sawrkarin SEDP sum atanga a lak pen cheng vaibelchhe 40 chu an la pe lo a nih pawhin pek thuai a nih a rin thu sawiin, “Finance minister-in a sawi tawh chu pechhuak ngei turah ka ngai,” a ti.

Health minister sawi dang:

8 SEDP hnuaia lak nurse/ health worker te rawih chhunzawmna tur sum a awm loh avangin chawlhtir an ni a. Hemi avanga health sector awngrawp palh thei venna turin thawktu awmsa semrual tura hma lak a ni. Department lama hotuten an zirchiang mek.
8 Thawktu indaihloh zualna phuhruk turin zirchian a ni a. Nurse 143 lak belh tumna chu sawrkara thlen a ni tawh. Loh theih loha thawktu lak belh ngai zat hi thawktu dangah pawh chhut chuah a nih hunah sawrkarah thlen leh a ni ang.
8 Sawrkarin ruang phurhna tum zel turin kalphung a duang mek a. A senso sum hi tun Budget Session-a pass theih tura dah tum a ni.
8 National Health Mission hnuaiah District Hospital 10-ah thisen/zun adt. endikna laboratory changtlung tak din tum a ni a. A thawhkhatna atan district pathum – Siaha, Hnahthial leh Champhai ah hma lak hmasak a ni.
8 NHM hnuaiah tho CHC/PHC 21-ah Block Public Health Unit anga laboratory din tura hma lak a ni a. Block 7 – Ngopa CHC, Vairengte CHC, Kawrthah CHC, Chawngte CHC, Thenzawl CHC, Cherhlun PHC leh Tuipang PHC chu hawn theiha peih an ni tawh.