Paris khawpuia 2024 Olympic Games nghah turah hian International Olympic Committee (IOC) chuan sipai chakna hmanga a thenawm ram Ukraine run mektu Russia leh a thurualpui Belarus infiammite chu an ram behchhan ni lo neutral athlete ni chunga tel ve phalsak tumna a nei mek a, hei hi Ukraine chuan na taka sawiselin, an hmelma ram pahnih infiammite hi neutral nihna nen pawh Olympic-a an inlan a nih ngat chuan Paris Games hi boycott an tum thu an puang a; tunhnaiah IOC president Thomas Bach chuan Ukraine chu Paris Olympic boycott an tumna bansan turin a ngiat ve thung.
-- Advertisement --
IOC-in Russian leh Belarusian athlete-te tana neutral nihna nena kawng hawnsak a kamkeu rual khan Ukraine chuan he rawtna hi na taka dodal nghalin, khawvel pawh an duhlohna thlawp turin a ngen a; Ukrainian President Volodymyr Zelenskiy chuan IOC hnenah Olympic-a Russian infiammi tawh phawt tel pha lo tura ngenin, Nordic leh Baltic region an tih rama Olympic body hrang hrang leh an lawmaker-te pawhin Ukraine hi an thlawp ve nghal.
Ukraine lamin boycott an sawirik hnuah German pachal Bach chuan ziakin Ukraine National Olympic Committee (NOC) president Vadym Huttsait hnenah Paris 2024 boycott an tumna kaltlangpui lo se an duh thu a hrilh a, a thuphunga sawi awm mah se Olympic Games Paris 2024-a neutral athlete anga Russian leh Belarusian infiammite teltir chungchang mumal taka ngaihtuah pawh a la awm loh hrim hrim thu a lehkhaah chuan a tarlang.
IOC thuchhuah chuan boycott chu Olympic Charter palzutna a nih thu tarlang telin, Russian leh Belarusian mite teltir ve tumna thawm awm pawh UN resolution-in Olympic movement tawh phawta inthliarna awm lo se a tih bechhana ngaihtuahna seng chauh an nih thu tarlan tel a ni bawk.
Paris 2024 organisers lam chuan ram pahnih infiammite tel tura ziahluh leh ziahluh lohah chuan IOC thutlukna ang ang an pawm tur thu an sawi.