A tha lam zawnga social media hmang turin chah

Social media chu hman kawngah mipui kan fimkhur a ngai a, a tha lam zawnga hmang turin a chah tih minister C Lalsawivunga chuan a sawi.
Thawhtannia ZPM office-a inkhawmah C Lalsawivunga hian, tunhnaiah social media hmang thiam lo kan pung nasa a, mipui kan fimkhur a ngai hle tih a sawi. Social media chu mimal tin leh pawl dinhmun tichhe vek thei leh chawikang dawrh thei a ni a, a tha zawng leh a chhe zawngin mipui min nghawng mek tia sawiin, “Thu tling lo leh thu dik lo vawrhdarh nan social media hi hmang lo ang u. Zirlaite pawhin tangkai takin an zirlai atan hmang thiam se, chutiangin mimal, pawl leh kohhran bakah politic huangah pawh a tha zawnga hmang theuh turin ka chah a ni,” a ti.
Zoram mipuiin ZPM sawrkarah rinna sang tak an nghat a, an ti beidawng thiang loa, ram tan an tih theih zawng zawng ti turin hma an la mek tih minister hian a sawi. “Mipui leh party worker-te pawhin kalphung thar hi min thlawp tha hlein ka hria a, tha taka kan thawh ho zel ka beisei,” a ti.