Afcon champion Ivory Coast

Pathianni zan khan African Cup of Nations (Afcon) 2023 final khelh a ni a, inkhel hmuhnawm takah cancer dam leh Sebastien Haller goal thun hmangin Ivory Coast an champion. Inelna thlengtu Elephants hian champion zin kawng ngaihnawm an hnutchhiah.
Stade Olympique Alassane Ouattara-a final hmuhnawm takah team huaisen, sawi dan danga team vannei Ivory Coast in nidang ang bawkin goal an chhuah hmasa leh a, hun tawp dawn hnaihah Haller goal thun hmangin hnehna an chang leh nawlh. Afcon hmachhawn tur zawnna ata chetha ngai lo, inelna neih lai meka an manager ban hialtu Ivory Coast champion kal kawng hi a ngaihnawm hle a, champion tur renga khuanu duan lawk emaw tih mai tur an ni.
Final hmuhnawm takah hian Nigeria in bul an tan tha a, minute 38-naah William Troost-Ekong chuan hmahruaina goal a thun. An chin tan angin Elephants hian goal an chhuah hmasa leh. Minute 38-naa an goal chhuah hi an sut lawk thei lova, hnufual zawkah an tang reng. An muala an mipui pungkhawmte tih beidawn an duh lova, huaisen taka inlanin an ram mite beisei ang ngeiin hnehna an chang let.
Ivory Coast tan hian player langsar Franck Kessié chuan minute 62-naah goal thunin an si phurh a sut. An si phurh an sut vangin phurna namen lo tak an nei thar a, an che vel a hmuhnawm leh zual sauh. Goal thun ngeia thapui thawh chhunzawmin, hun tawp dawn hnaihah an vannei. Minute 81-naah cancer dam leh Sébastien Haller chuan goal hlu zet mai a thun a, an ram chu hma a hruai let pui. Haller goal thun hi Nigeria in an sut thei tawh lova, mak leh ropui takin Ivory Coast chu Africa khawmual champion an ni ta a ni.
Afcon champion thar Ivory Coast hi kum 1992 leh 2015 khan an lo champion tawh a, Pathianni zan khan an khelmualah ngei an champion. Afcon-ah hian a thlengtu an champion mawh viau a, Ivory Coast hi kum 2006-a Egypt an champion hnua inelna thlengtu champion leh hmas ber an ni.
Tarlan tawh angin Ivory Coast hian Afcon champion ni turin zin kawng ngaihnawm leh harsa an zawh. A thlengtu ni mah se Group stage-ah an khel chhe hle a, match thumah vawi khat chiah an chak. Equatorial Guinea phei chu si li fai ngawtin an hneh lova, an mualah ngei dawl zawr takin an zawr. Group stage-ah hian pathumna an ni a, pathumna zingah palina an ni a, knockout round an lut hram. Last 16 lut bawk mah se group stage an khelh zawh rual rualin an manager Jean-Louis Gasset an ban zui nghal.
Emerse Fae enkawlna hnuaiah last 16 an hmachhawn a, champion lai Senegal lakah si an phur reng a, hun tawp dawn hnaih minute 86-naah an si phurh an sut hram. Penalty shootout ah vannei zawk an ni a, quarter-final an lut hram. Quarter-final-a an khingpui Mali lakah si an phur reng a, minute 90-naah an si phurh an sut hram. Penalty shootout an hmachhawn leh tura ngaih a nih hman laiin minute 120-naah chakna goal an thun hlauh a, vannei takin semi-final an lut. Semi-final hun rei tak goal an thun theih loh hnuin Sebastien Haller goal thun hmangin hnehna an chang hram a, final an lut. Final-ah pawh si an phur hmasa leh a, an chak let leh ta tho. An champion kal kawng hi a bumboh hle. A zin kawng paltlang en hian team huaisen an ni a, tin, an vannei tel bawk.
Afcon 2023 ah hian South Africa chuan penalty shootout-ah 6-5 in DR Congo an hneh a, pathumna an ni. South Africa hi kum 24 hnuah Afcon-a an chetthat ber tum a ni nghe nghe.