Palace manager damdawi inah

Palace manager damdawi inah
Training laia a dam loh thut avangin English coach hriat hlawh zinga mi Roy Hodgson chu damdawi inah dahluh a ni a, Crystal Palace thuchhuah chuan an manager dinhmun chu ngaihtuahawm a nih loh thu leh tlakhniam lam pan loa a dinhmun a ngialngheh thu an puang a, damdawi inah test chi hrang hrang kalpui mek a nih thu leh club chhunga mi zawng zawngin dam leh thuai tura duhsakna an hlan thu X kaltlangin an tarchhuak.
Ningani zing khan kum 76 mi Hodgson hian training ground-ah a naute a luhpui a, mahse, training lai hian damlohnain a tlakbuak zui ta thut a, Palace pawhin news conference nei tura ruahmanna an lo siam tawh an thulh zui ve nghal a ni.
Media-te report danin Ningani khan press conference chu kaltlangpui thei ni se Premier League table-a 15-na daih luahpui chunga point nga chiaha relegation zone nena an inkar dahtu an coach chhawr lai banna thu Palace chuan puan an tum a, damlohnain Hodgson a chhan leh ta rih niin a lang!
Inhamtang tura chak mamawh Crystal Palace hian Thawhtanni Premier League match-a Everton hmachhawn turin Goodison Park an lut dawn a ni.
BBC Sport tarlan danin Hodgson thlaktu atan hian club lam chuan Eintracht Frankfurt boss hlui Oliver Glasner an hual fel tawh a ni.
Kartawp Selhurst Park inkhela mikhual Chelsea laka 3-1-a an tlawmna kha Hodgson-a tan Palace manager ni chunga match 200 a puitlinna chiah niin, nikum September thlaa Old Trafford khelmual ngei maia Manchester United an hneh hnu khan league-ah vawithum chiah an la chak a, top-flight match an khelh hnuhnung 16-a vawi 10 ngawt an tlawm tawh avangin an manager ban tum hian club thuneitute’n thutawp an siam tawh nia sawi a ni.
England boss hlui hi Palace-in an vawihnih rawihna niin, nikum khan Patrick Vieira thlakin hun rei vak lo atan contract an ziahpui a, season liamtaah khan an game hnuhnung 10-ah team a enkawl hman.
Chuti lek team enkawl hman chungin Premier League table-ah 11-na a nihpui hman a, 2023-24 campaign-a team kaihruai chhunzawm leh turin inremna an ziahpui a, mahse, a hoa tlakhniam lam an pan zel tak avangin tunhnai chhoah supporter lamin Hodgson ban tura an duhna thuziakte an lekchhuak ta fo a ni.
Thla hmasa FA Cup third-round match pakhata Everton an hneh lohna game minute 64-a Eberechi Eze a lakchhuah tum pawh khan an fans lamin boss game kalpui dana an lungawilohna lantirin, Goodison Park-ah ‘i thiltih hi i hre hlawl lo’ tiin an aurual khum chiam nghe nghe!