Qatar Open atangin Nadal inhnukdawk leh tawh!

World number one hlui Rafael Nada chuan tun season kal lai tawp rual hian tennis chawlhsan ve tawh a tum a, a racket a khai hma ngeia a ropuina mual French Open-a title han beisei leh a tum laiin competitive tennis khel chhunzawm thei lo zawng bawkin a intina leh a, khelmuala a kir tumna hnaivai ber Qatar Open atang pawhin a inhnukdawk leh tawh!
Kumin January thla Brisbane International khelh laia a inhliam atang khan kum 37 mi ni ve tawh Nadal hi khelmualah hmuh tur a awm leh ta lo vang vang a; kha tournament-a a khel bawr a tihnat hnu khan Australian Open-ah pawh a inlan thei lo a ni.
Chutiang dinhmuna ding chung chuan karleh Thawhtanni atanga Doha khawpuia khelh tan tur ATP 250 tournament chu khelmuala kirlehna hmun atan a tinzawn zet a, mahse, grand slam title 22 la tling tawh Spaniard hian X lamah thuthar a nei leh a, Qatar Open a khelh theih dawn loh thu puangin, “Theihtawp ka han chhuah zel ang a, Las Vegas exhibition atan leh Indian Wells tournament lamah chuan ka inpeih hman tawh ka beisei,” tiin a kir hun tur a pawthla leh ta rih a ni.
Ruahman lawk ang chuan March ni 3 khian Nadal hi Las Vegas khaw exhibition match pakhata a chipui Carlos Alcaraz hmachhawn tur a ni a, a taksa lamin harsatna a tawk zui lo a nih chuan a hnu lawkah ATP comeback hmahruai atan Indian Wells lama inlan zui tur a ni.
Tunhnaia Spanish broadcaster La Sexta-in an kawmnaah Nadal hian a chawlh hma ngeiin kumin chhung hian tournament engzatnge a hmachhawn hman dawn tih a sawi thei lo.
A hmabakah hian Grand Slam pathum – French Open, Wimbledon leh US Open bakah kumin nipui laia nghahchhuah tur Olympic Games a la awm a, he’ngahte hian a inlan kim thei a nih chuan Snpaniard tan lungdam deuh zawka tennis a chawlhsan theih a rinawm!
2008 Beijing Games-a Spain tana gold medal lo awrh ve tawh Nadal chuan a hmabak inelna lian hoah hian khawi khawi hi nge a khelh theiha a khelh theih loh tur tih la sawi thei lo mah se tournament tam a hmachhawn theih loh tur thu a sawichiang a, “Roland Garros chu ka goal zinga pakhat a ni ngei mai a, Olympics khelh leh ka chak hle bawk. Tunah erawh a eng-a-mah hi ka la nemnghet thei lo a, ka beisei, ka ngaihtuah tih vel a la ni,” tiin a hmachhawp a sawi.
Nikum khan kum 19 chhunga a vawikhatna’n French Open a khel lo a, May thlaah a hma hun tur sawichiang nghalin, kum 2024 hi a career-a a kum hnuhnungber tur a nih thu a lo sawichhuak tawh a ni.