Kanye West-a’n ‘Vultures’ album-a Taylor Swift hming a lam chhuah chungchang a sawifiah

Kanye West-a’n ‘Vultures’ album-a Taylor Swift hming a lam chhuah chungchang a sawifiah
Kanye West chuan a album thar ‘Vultures 1’ a ‘Carnival’ tih hlaah Taylor Swift hming a lam chhuak a, mahse, heta Swift hming a telhna chhanah hian eng rilru chhia mah a put loh thu a sawi. Kanye hian a hla thuah- “I mean since Taylor Swift, since I had the Rollie on the wrist/ I’m the new Jesus b—h, I turn water to Cris,” tih a telh a ni.
West chuan Instagram-ah Taylor Swift fans thenkhatin ‘Carnival’ hla hi Billboard Hot 100 chart-ah No.1 a nih loh nan Swift chu Beyonce hla thar support tura an ngenna screenshot a post a, “The New Jesus B–H ka intih hian rilru lam ngaihtuahnaah Taylor Swift a lang lo hrim hrim. A hma lam tlar khat chuangah daih a nih kha a awm. Mahse, free promo avangin a lawmawm tho e,” a ti.
West chuan Scooter Braun leh Swift te inkar a chhiat vanglai pawh khan Swift hi a lo tan tawh thin niin a sawi a, ‘Vultures’-ah hian Braun hi a kap ve hlak bawk a. West chuan, “Scooter-a’n a hriat loha a master a lei lai khan Taylor lam tang ka ni tih hre reng ula. Ani leh Beyonce hi musician te inspire-tu an ni a, an sell out tour leh movie-te kan sawi reng mai a ni,” a ti bawk.
Kanye West chuan Taylor Swift career-ah hian a thalo zawng aiin a tha zawngin a pui nasa zawka a inhriat thu a sawi a, “Taylor Swift career-ah hian a chhe zawng aiin a tha zawngin ka tangkai zawk daih tih ka chiang a ni. Taylor Swift fans zawng zawng te kha inhmelma ka ni lo uuum inthian pawh ka ni chuang law lol,” a ti bawk.
Kanye chuan, “Nikum kha ka tan chona a nasa em em a, ka nupui leh fate, thiante leh chhung te tan pawh a ni vek. Hotel thenkhatah ka thlen an phal lo va, company thenkhatin min hnawl a, restaurant thenkhatin an dawra thil ka ei te pawh an phal lo. Vultures 1 hi platform thenkhatah an dah duh lo a, a kar khatnaa kan hralh tlem nan an tih vang a ni. Hei hian keinihohi kan vun rawng avanga hnuaichhiah kan nihna min hriatchhuah tir leh thin,” a ti bawk.
Sawi neuh neuh karah Kanye West album thar hi karleh Billboard 200 (albums) chart-ah pawh a No.1 leh thei mai dawnin a lang a, he album hi a No.1 a nih chuan Kanye album he chart-a No.1 thei 11-na a ni ang.