Real an tawlhtlu det

Real an tawlhtlu det
An mawngphe rawn hmu pha ve reng leh a changa rawn lehthal zauh zauh rengtu Girona leh pathumna Barcelona tana Spanish title race tibeiseiawm leh sauh turin Pathianni zana Real Madrid fehchhuak chu an thenawm Rayo Vallecano mualah an chak zo lo a, mualneitu team nen sikhat ve ve thuna inhnehtawkin, La Liga table-a an hmahruaina la pangangai bawk mah se an aia match khata khel tlem Girona nena an inthlauhna point rukah a ding a, pahnihna luahtu team hian point thum rawn hmu leh se khelh inangah point thum chauhin hmahruaitu team pahnih hi an inthlau thei dawn.
Hriam taka bul tan Bernabeu club tan Stoke City leh Newcastle United striker hlui Joselu chuan Fede Valverde chhawpsak atangin tan atanga minute thumna lekah mikhual hmahruaina leh season kal laia a club vawn lai tana a goal 14-na ni bawk a khung a; darkar chanve khelh tlin dawnah video assistant referee-in Real player Eduardo Camavinga chu handball-ah puangin, Raul de Tomas chuan penalty atangin Rayo siphurh a sut.
Goal hmahruai an hlawhchhuak tih loh kha chu Real-in hlauhawm thama goal chance siamchhuah an harsat a, an khelh zui zel dan enin point khat hawn kha an tan result chhia a ni lo ang.
Nizan result tarlan hman lohah Girona-in Athletic Bilbao an luhkhung ve leh a, an chak a nih chuan tum 35 tehreng La Liga champion ni tawh Real Madrid nena an inkar chu, tarlan tawh angin, point thumah an pawtzim ang.
Real Madrid hi Inrinni zana Celta Vigo hnehtu Barcelona lakah point riatin an sang tawh a, Catalan team tan an hmelma kuta title awm chhuhsak tur chuan tih ve fe a ngai tawh ang!
League season kal laiah Carlo Ancelotti team hi vawikhat chiah an la tlawm a, vawi 19 chakin, draw vawinga an nei tawh a; Pathianni zan khan lei fuh England midfielder Jude Bellingham a inhliam hlauh avangin Rayo Vallecano mualah a inlan ve thei lo.
Estadio de Vallecas chhung boruak hot leh bengchheng zet hnuaia inkhel kha kum 36 leka upa manager thar Inigo Perez hoa Rayo inkhelh vawikhatna niin, team inthlungkhawm leh inthunun tha lutuk hnuaiah Real meuh pawhin goal thun theihna hun remchang an siamchhuak tam thei lo a nih kha!
75th minute substitute Dani Carvajal kha minute hnih chhung leka yellow card tum hnih a hmuh hman avangin hun pekbelh tawp dawnah hnawhchhuah a ni a, a tlem zawk an nihna erawh mikhual team-in an tuar hman ta chuang bik lo.