Rihanna & Jay-Z ‘Umbrella’-in 1B view a kai

Rihanna ‘Umbrella’ featuring Jay-Z music video chuan YouTube-a an upaload atanga kum 15 hnuah vawi tluklehdingawn en a hlawh ta. YouTube-a vawi tluklehdingawn en hlawh thei music video neih hi zaithiamte tan mellung pawimawh pakhat a ni ve tlat. Chutihrualin kum 10 hmalama music video lar tak tak te pawh vawi tluklehdingawn en la hlawh pha lo a tam hle a, hei hi an lar vanglaia khawvelin tun anga YouTube a la hmel hriat loh vang a ni.
‘Umbrella’ hla hi Rihanna lar chhuah tak tak hla niin, Jay-Z a rap-in bul an tan a, a music video-ah chuan model hoddie dum ha leh sunglass vuah te nen puanzar hmaah dingin mei si ang deuh a sur seng seng bawk. Chutah a hunlaia kum 21 mi, Rihanna chu nihliap keng chungin a rawn inlan a, zei hawi takin a rawn intheh kual ta vel a nih kha.
Umbrella hla hi Billboard Hot 100 (singles) chart-ah 2007 khan No.1 a kai a, kar sarih chhung a No.1 zui a, vawiin thlengin Rihanna hlaah chuan he chart-a No.1 ni rei thei ber a la ni a, Jay-Z pawhin he aia chart No.1 ni rei thei hi hla pakhat chiah a nei a, chu chu 2003-a Beyonce nena an zai dunna ‘Crazy in Love’ kha niin, he hla hi Hot 100 chart-ah kar riat a No.1 thei.
Rihanna leh Jay-Z te hi an thawk dun nual tawh a, 2009 khan Kanye West nen an pathumin ‘Run This Town’ an tichhuak a, 2010-ah Bono leh The Edge hoin ‘Stranded (Haiti Mon Amour)’ an tichhuak a, 2011-ah ‘Talk Tat Talk’ an tichhuak dun taw bawk.