Budget-ah thil thar tam

Nimin khan Mizoram state budget 2024-2025 chu Finance changtu Minister Lalduhoma Chief Minister chuan a pharh ta a. Tun tum budget pharhah hian thil thar hmuh tur a awm nual a, budget estimate ruangam pawh mipui nawlpui tan hriatthiam awlsam tura duan a ni.
Budget-ah hian kum 2024-25 chhunga sum hmuh tura beisei chu cheng vaibelchhe 14,412.12 a ni a, kum kal mek 2023-24 aia a sanna chu 1.42% a ni. Budget pumpui atanga 82.97% hi sawrkar hnathawk hlawh leh sawrkar department hrang hrang enkawlna senso, etc. atana hman tur niin, a bak zawng 17.03% chu hmasawnna hna thawhna atan ruahman a ni.
Budget-ah hian thil thar pakhat tha tak mai chu, sawrkar laipui atanga scheme hrang hrang sum lo do letna tur (matching share) dah hran hi a ni awm e. Hei hi counterpart funding tih niin chuta tan chuan cheng vaibelchhe 250 (nuai 25,000) serh hran a ni.
Sawrkar flagship programme Bana Kaih atana hman tur cheng vaibelchhe 200 dah hran a ni bawk a, he policy kaihhnawh department-te chu an scheme leh proposal azirin sum pek an ni dawn a.
Thil thar dang leh chu, thingtlang lam mi khawsak harsa zualte phurrit chhawk zangkaina a ni a, chu chu khawpuia an boralin, an ruang phurh hawna atan sawrkar chuan budget a siam a, chu chu cheng nuai 500 a ni a, Social Welfare Department kaihhruaina hnuaiah buaipui a ni dawn a. Hei hi bialtu MLA-te tan pawha phurrit chhawk zangkhaina tur a ni nghal ang a, buaina tam tak a sukiang dawn a ni.
Healthcare lama indaih lohna phuhruk nan cheng vaibelchhe 20 (nuai 2,000) dah a ni te, power supply mumal zawka kalpui a nih theih nana cheng vaibelchhe 20.13 dah a ni leh, inkalpawhna kawngpui leh lei dawh thawm that ngaite thawm that nan cheng vaibelchhe 100 (nuai 10,000) dah a nih thu mipui nawlpui hriat theih tura fiah fai taka tarlan theih a ni te hi a lawmawm hle a ni.