Kir tura sawi Aguero a pha
Kir tura sawi Aguero a pha
Tunhnaiah Sergio Aguero chu football khelh a chawlhsan tawhna atanga inlamleta khelmual lut leh tur angin thu a thang a, hei hi phain, Argentinian club Independiente behchhana training zawm tumna a neih loh thu a sawichiang nghal.
Lung lam natnain a tlakbuak tak hlauh avangin Argentina forward hlui hian December 2021 khan kum 33 mi lek niin a Barcelona thuam a hlip a, football khelh a chawlhsan thu mittui nen a puang.
Taksa hriselna lamah harsatna tawk lo ni se ram tan pawh la inkhel thei tura ngaih niin, a chawlh hnuah amah aia upa Lionel Messi hoin Argentina chuan World Cup trophy an hawn a, world champion medal awrh ve lo zawngin Aguero a khawsa!
Manchester City player awm tawh zawng zawng zinga goal khung hnem ber ni mek Aguero hian rawlthar a nih laiin an ram club Independiente-ah a career a tan a, tah ngei chuan training a zawm leh dawn tih thuthang a richhuak hluai a, chu chu sawifiahin khelmuala kirleh tumna a neih loh thu a sawifiah ta a ni.
Kun Aguero chuan, “Dawt muhlum a nih kha, Independiente-ah training ka zawm dawn lo. Thil hi an hmuchhuak thin mai mai a ni.
“Cardiologist chuan ka dinhmun that thu a sawi ngei a, ka hriselna dinhmun tha chu a pawimawh reng a, mahse, First Division level meuha training zawm tur chuan ka lung dinhmun endikna tamtak paltlang ka la ngai ang,” tiin chuti maia training zawm thei a la nih loh thu a sawi.
Aguero hian tunhnai khan Twitch hnenah Independiente coach Carlos Tevez-a’n a ko a nih phawt chuan kir thei a ni em tih enfiah tura a cardiologist rawn mek a pan tur thu leh training zawm thei tur a ni dawn em tih fiahna a hmachhawn tur thu a tarchhuak ve bawk a, chu chu mi thenkhatin hmanruaa hmangin a club hlui behchhana training zawm leh thei turin an sawi ta mai a ni.
Tevez pawh hian an kianga hun hman a duh phawt chuan lawm taka amah leh team pumpuiin an lo kuangkuah tur thu a sawi ve bawk.
Manchester City leh Argentina tana Aguero khelhpui thin Tevez chuan, “Tunge Kun chu duh lo tehlul ang ni? Ka tan phei chuan ka teammate a lo ni tawh a, tunah a coach nih leh a nih dawnte chuan minute 10-15 lek pawh ni rawh se,” tiin Auguero coach han nih vel a hreh loh thu a sawi!