Phaitual wushu inelna lianah Mizo nula champ

February 22-25, 2024 chhunga Jharkhand khawpui Ranchi-a khelh zawh tak 7th Senior National Wushu Championship (Federation Cup)-ah Mizo nula Laltluangkimi (Tete-i) chuan Mizoram tan kg 65 huangah gold medal a hlawhchhuak.
Leng khaw naupang ni thin, tuna Mission Vengthlanga cheng mek Tetei hian gold a sualchhuahna kawngah Andhra Pradesh, Punjab leh Madhya Pradesh state aiawhi a tukdawl zawh vek hnu final-ah Haryana player a hneh leh a, phaitualah Mizoram tan gold medal a hlawhchhuak.
He Federation Cup-ah hian Mizoram Wushu Association chuan player panga (mipa pali leh hmeichhiapakhat) a tirchhuak a; gold medal pakhat bakah bronze medal hawn telin, he medal hi Lalruathlua s/o Hautluanga (Luangmual)-in kg 70 huanga a lak a ni.
Hlu hian a bout hmasaber a bye hnuah Assam, Uttar Pradesh leh Haryana aiawhte hneh chungin lawmman semna dawhsan hniam ber a luah.
Mizoram team hian Thawhlehni khan Aizawl lo thlengin, Lengpui Airport-ah Mizoram Wushu Association hruaitute’n a lo hmuak a, lawmpuina thilpek an lo hlan a ni.
Mizoram Wushu Association president Lalhmingmawia Sailo chuan sawrkarin nasa taka a buaipuina rah an seng kal mek tih sawi chungin sawrkar buaipuina zarah he’ng aia tam medal lak zel an in inbeisei tih a sawi a; player-te pawh puih tlaka awm tur leh hruaitute thuawi taka awm turin a sawm nghal.
Player-te lawmpuina hunah hian working president PC Lalhlunmawia pawhin thu sawiin, player-te chu kawng engkima discipline vawng tlat turin a chah a, a bik takin Mizote ei leh in kawnga kan inven fimkhur tawk loh thu sawiin, pumraw inang rau rauah category weight-a then a nih huna a te zawk nih kan hlawh fo thinna hian harsatna min thlen tih a sawi.