Singapore-ah ‘Taylor Swift concert economics’

Singapore-ah ‘Taylor Swift concert economics’
Coldplay leh Ed Sheeran te hma an lo hruai tawh a, tunah Taylor Swift a rawn lang ve leh ta a. Singapore chuan ‘concert economics’ an tih mai, zaithiam te concert avanga ram economics a tha zawnga a thanna an tawng ve leh ta a, dollar maktaduai tel tak meuh meuhin an ram tourism sum che vel a pung e.
Singapore hian khualzin te a hip tawh sa hrim hrim a, mahse, khawvel huapa zaithiam lar ten an rama concert an neih hian an ram tourism-in a hlawkpui thin a, tunah chuan Taylor Swift-in an ramah show vawi ruk a nei dawn tih puan a nih atangin an ram economic a nghawng nghal lawih mai a ni.
Taylor Swift hian Southeast Asia ram dangah Eras Tour a neih mek chu a luhpui ve dawn lo a, Singapore-ah hian concert vawi ruk a nei dawn thung a ni. Thailand Prime Minister pawhin Singapore hian Swift hi Southeast Asia ram danga show nei lo tura hup beh nan an rama Swift concert vawi khatah Swift hnenah hian dollar maktaduai 2-3 zel pek an tum tih a lo sawi tawh nghe nghe a ni.
ASEAN economist Yu Liu chuan khawvel huap zaithiam lar ten Singapore-a show an neih hian an ram sum leh pai dinhmunin a thin niin a tarlang a, tunah Swift concert tum ruk neih tur pawh hian an ramah khualzin a hip luh belh nasa dawn a, chu chuan an ram GDP chu 10% velin a tipung thei dawn ni a a ngaih thu a sawi.
Tunkar tawp atang hian Singapore-ah Swift Eras Tour hi an tan dawn a, Liu chuan, “Taylor Swift hian economic lamah a tha zawngin nghawng a rawn nei deuh lawih dawn a, hei hi a record thlirin a chiang a ni,” a ti.
Taylor Swift-i’n Singapore-ah concert tum ruk a nei dawn tih an puan atangin Singapore-a hotel booking chu kum March thla atan 10%-in a pung nghal niin hotel analytics company Smith Travel Research chuan an tarlang a, hetihrual hian Singapore-a thlawk lut tur thlawhtheihna ticket booking pawh a pung nghal bawk a, a biktakin Bangkok, Manila leh Jakarta atanga Singapore thlawk lut tur ticket booking phei chu 20%-in a pung nghal niin Jetstar Asia chuan an tarlang.
Swift hian Asia-Pacific ram hrang hrangah Japan, Australia leh Singapore-ah te chia Eras Tour hi a kalpui dawn a ni. Singapore-a Swift tour hian Singapore tourism sum chevel chu Singaporean dollar maktaduai 350 atanga 500 (US dollar maktaduai 260 atanga 371 vel) a tling thei dawn niin an chhut a, concert chhimtu 70% chu ram pawn atanga thlawk lut tur ni a an ngaih thu Maybank-a macro research director Erica Tay chuan a sawi ve bawk.