Aizawl North-II bialtu MLA Dr Vanlalthlana chuan a bial chhunga Govt. Ramhlun Vengthar Primary School thawmthatna atan a fund a pe a, Inrinni khan thawmthat hnatlang a tawiawm bawk.
-- Advertisement --
Ramhlun Vengthar Primary School hi kum 1972-a din niin, a building awngrawp deuh laite thawmthat thin a ni chungin, ruahsurah a chung a far nasa tawh a. Bialtu MLA hian school sakthatna atan a MLA fund sanction chu YMA Ramhlun Vengthar kutah a hlan a. YMA hian hma la ngahlin, hnatlang an ko ta a ni.
Khawtlang tangrualin vengchhung school tana thahnem an ngaihna kawngah a lawm takzet tih Dr Vanlalthlana hian a sawi a. School chung thlak leh classroom ceiling siam a nih dawn bakah school kawt cement-a zut thar vek a ni dawn tih a sawi a ni.
Aizawl North-II bialtu MLA hian a bial chhungah zirna in thenkhata hma a lakna angin Govt. Ramhlun Vengthar P/S pawh hi YMA Ramhlun Vengthar Branch nen inremna ziakin, ‘MLA Adopted School’ a puan a ni a. Adopted School enkawlna atan hian School Education Department leh MZU-a mithiamte consultant atana ruaiin, an ruahmanna angin hma an la thin a ni.