Vawiinah LPS Cup chhunzawm dawn

Ni hnih chawlh a nih hnuah Mahindra XUV300 LPS Cup round of 16 chhunzawm a ni dawn a, vawiin tlaiah Thenzawl Joint v Dinthar, zanah Chhinga Veng leh Bethlehem Vengthlang an inkhel dawn.
Rajiv Gandhi Stadium, Mualpuiah vek final thlengin khelh a ni tawh dawn a, LPS 1-ah live-a pekchhuah vek a ni ang.
Round of 16 hmasa ber chu vawiin tlai dar 4:30-ah district dang atanga sawm bik zinga mi Thenzawl Joint leh YMA football-a tum hnih champion tawh Dinthar an inhmachhawn dawn a; an khelh hnuhnun berah Thenzawl team-in goal li goal thumin Zemabawk North an hneh a; vawi hnih si phurin a tum hnihnaah goal thum goal khata hniam zawk an nih hnuah ropui takin an kir leh a, minute 89-ah Malsawmtluanga Ralte chuan an si phurh sut zovin minute 90 hnuah Remsangpuia’n chakna goal a khung a ni.
Dintharin Lalsangpuia goal hmangin sikhat faiin Aibawk an hneh ve thung a, Thenzawl Joint lakah fiahna pawimawh tak an hmachhawn ang.
Thawhlehni zan dar 8 atangin champion tawh ve ve Chhinga Veng leh Bethlehem Vengthlang an innuai dawn a; round of 32-ah Chhinga Vengin goal nga goal khatin nikum YMA football-a final lut Tlangnuam an hneh a; Lalhmunmawia’n hattrick siamin C. Lalchhuanawma leh Rochharzela’n vawi khat ve ve an tilut bawk.
Kum 2016 champion Bethlehem Vengthlangin sihnih faiin Edenthar an hneh ve thung a; Hmingthanmawia leh Lalrammawia’n chawlhlawk hma leh hnuah an khung a ni.
Nilaini tlai dar 4:30pm Salem Veng leh Kawnpui Joint, zan dar 8-ah Bethlehem leh Ramhlun South, Ningani tlai dar 4:30-ah Armed Veng leh Durtlang, zan dar 8-ah Kulikawn leh Vaivakawn; Zirtawpni tlai dar 4:30-ah Republic Veng leh Sihphir Venghlun, zan dar 8-ah Ramhlun North leh Sialhawk inkhelin round of 16 zawh a ni ang.
Inrinni zan dar 8-ah LPS Auditorium-ah quarter-final atanga final thlenga an inkhelh chhoh dan tur pawh that leh a ni dawn a ni.