Ruihhlo ngaite enkawlna Jordan Centre Sethawn dinhmun enfiahin Inrinni khan Social Welfare minister Lalrinpuii chuan a tlawh.
Minister hian Centre hmunhma fangin, thawktute leh ruihhlo ngai enkawl mekte a kawm a. Thawktute nen an inkawmnaah hian tuna an dinhmun leh inenkawl dan sawi ho a nih bakah rawtna an neih angte a ngaihthlak sak a. Ruihhlo ngaite enkawlna hmun chu tangkai leh changtlung zawka thuamthat a nih theih dan kawng zawn a tul tih a sawi.
Tun dinhmunah Jordan Centre-ah hian ruihhlo ngai enkawl mek mipa 22 leh hmeichhia 5 an awm a. 2022 February thla atang khan ruihhlo ngai enkawl tan niin, vawiin thlengin mi 648 enkawl an ni tawh. Thawktu hi Centre director nen mi 40 an awm.
Minister hian a department chan hnuaia hmunhma dang – Thingdawl ICDS hmuna District Child Protection Office Kolasib hnuaia Observation Home leh office thar sak mek bakah Tourism department hnuaia Thingdawla Highway Restaurant a tlawh bawk. Kolasib bialtu MLA, deputy speaker Lalfamkima leh Tuirial bialtu MLA K Laldawngliana te bakah Social Welfare leh Tourism department hotuten an tawiawm a ni.
Minister-in Jordan Centre tlawh
Get real time updates directly on you device, subscribe now.
Prev Post