C Ronaldo leh a pawlte an tlawm

Asian Champions League quarter-final penalty shootout-ah 3-1-a Al-Ain hneh loin Cristiano Ronaldo khelhna Al-Nassr an tla fel.
Al-Nassr hi first leg-ah sikhat faiin an chak a, second leg-ah sihnih phurh belh lehin, tlawm tura ngaih an nih hman hnuah beiletin 3-3 score nen extra time an chuangkai hram a; hun pangngaia goal khung zo lo Ronaldo chuan minute 118-ah penalty chhuihlutin player 10-a khel Al-Nassr chuan 4-4 aggregate an sualchhuak a, penalty shootout-ah an tlawm zui ta tho a ni.
Al-Nassr player zinga chak tur zawnna penalty peta goal khung thei awmchhun chu Ronaldo chiah niin, kum 32 mi hian penalty-ah Al Ain goalkeeper vawihnih a paltlang a, an team tlawm tur erawh a chhan zo ta chuang lo a ni.
Ballon d’Or chawimawina vawinga dawng tawh Portuguese hian 2-3-a an hnufual lai khan hnai zet atangin an siphurh sut zawh theihna hun remchang a hmu a, Al Ain goalkeeper zawn taka chhuihin a hlawhchham.
Minute 72-ah Manchester United player hlui ve bawk Alex Telles chuan Saudi Arabian club tan khungin Ayman Yahya hnawhchhuah avanga player 10-a khel Al-Nassr chuan extra time an khelh theih phah.
Extra-time first half-ah United Arab Emirates club Al-Ain bawk hi goal khung hmasaah tang lehin, hun tawp hma minute hnih la awmah penalty atanga Ronaldo goal a lut a, shootout hmanga pawhthen an ngai ta a ni.
Penalty pet tura Ronaldo penchhuah laiin Al-Nassr chu sihnih faiin an hniam tawh a, chutah Al-Nassr chuan thunin, Saudi team-in beisei chhete an nei leh zuai a, mahse, an vawili chhuihnaah Ronaldo team-mate Otavio chuan thelhin, Al-Ain zawk an tlang ta a ni.