Indian Wells-ah Swiatek kal zel

Medical timeout lak ngaia khelmual chhunga harsatna tawk Caroline Wozniacki laka world number one Iga Swiatek-i’n 6-4-a set khatna a lak hnuah Denmark player Wozniacki hi khel chhunzawm thei loin a inhnukdawk a, Poland nula Swiatek chuan Indian Wells tournament kal laiah hahdam zawkin semi-final a lut.
Ningani women’s singles quarter-final match-ah khan world number one hlui Wozniacki chuan 4-1-a hma a hruai zet hnuah set khatna a hloh a, hliam avangin khelmualah enkawl a han ngai a, chumi hnuah game khat khel zawm leh thei bawk mah se inhnukdawk lo thei loin a hliam chuan a tibuai zui ta a ni.
Kum 2022-a Indian Wells title lo hlawhchhuak tawh Swiatek hian California tournament-ah hian a zawnin kum thum chhung last four a lut tling ta a; nizanah Ukrainian Marta Kostyuk nen final luh an inchuh a, chak zawk tarlan hman a ni ta lo.
Kum 33 mi Wozniacki hian fa pahnih a hrin hnuah tennis a chawlhsan zet a, season liamta khan tennis inelna hmachhawn tura kirlehin, tun kha khelmuala a kirleh hnua tournament-a a thlensan ber tum a ni.
Inkhelh banah kum 22 mi Swiatek pawhin hliam vanga inkhel zo thei ta lo Dane Wozniacki chu a zah hle tih sawi chungin inkhel tluan thei loa hliamin a tlakbuak ta kha pawi a tih thu a tarlang tel.
Quarter-final inkhel dangah 31st seed Kostyuk chuan 6-0 7-5-in an ram run mektu Russia player 28th seed Anastasia Potapova a hneh a, a career-a a vawikhatna atan WTA 1,000 semi-final a lut.
US Open champion Coco Gauff pawhin Ningani last eight inkhel dangah 6-4, 6-3-in Yuan Yue a hneh a, nimina 5-7, 6-2, 6-4-a Emma Navarro vawtlatu Greek ninth seed Maria Sakkari nen vawiinah final luh an inchuh ve bawk ang.