Bon Jovi ‘Always’ leh Ariana Grande ‘Focus’ music video te billion view club-ah

Bon Jovi hla hit, a vanglaia kan ramah pawh thalai zawkin an sakpui theih ‘Always’ music video leh Ariana Grande ‘Focus’ music video chuan YouTube-ah vawi tluklehdingawn en an hlawh ve leh ta. YouTube-a vawi tluklehdingawn en hlawh theih hi music video tana mellung pawimawh a ni ve tawh tlat a ni.
Bon Jovi ‘Always’ hi 1994-a an tlangzarh kha a ni a, YouTube-ah 2009 khan an dah lut a, an music video YouTube-a vawi tluklehdingawn en hlawh thei pathumna niin, 2000-a an video ‘It’s My Life’ leh 1986-a an video ‘Livin’ On a Prayer’ ten he mellung hi an lo thleng ve tawh bawk a ni.
‘Always’ hi 1994-a an album ‘Cross Road’-ah khan an telh a, a vanglaiin Billboard Hot 100 (singles) chart-ah No.4 a kai a, Bon Jovi hla he chart-a top 10 kai thei 10 zinga pakhat a ni a, he hla hi an bass player Alec John Such-a’n band tana kut a thlakna hnuhnung ber niin, ani hian 1994 kum tawp lamah band a chhuahsan.
A album ‘Cross Road’ pawh hi Billboard 200 (albums) chart-ah No.8 kaiin, kar 57 chhung chart-ah a lang a, he album-ah an hla hit tak tak awmin “Livin’ On a Prayer,” ‘Wanted Dead or Alive,” “You Give Love a Bad Name,” leh “I’ll Be There” te awmkhawmna kha a ni.
Bon Jovi sawi takah chuan an docuseries ‘Thank You, Goodnight: The Bon Jovi Story’ chu part li a siamin, April ni 26 hian an tlangzarh dawn a, he docuseries-ah hian kum 40 chhunga an rimawi zinkawng chipchiar takin an tarlang dawn a, an chanchin hrang hrang bakah personal video, an demo hmasa lam la tihchhuah loh, original lyrics leh an thlalak la tihchhuah ngai loh te an dah khawm dawn a ni.
Ariana Grande ‘Focus’ music video pawhin YouTube-ah vawi tluklehdingawn en a hlawh ve leh ta a, YouTube-a hetiang zat en hlawh thei music video pariat a neihna a ni ta. He music video hi 2015-a YouTube-a upload kha a ni.
A hla hi 2015-a a tlangzarh, a studio album pathumna ‘Dangerous Woman’ atanga a lead single tura ngaih a ni a, mahse, Republic Records chuan he hla hi album-ah an telh leh ta lo a, an tlangzarh hlimah hian Billboard Hot 100 chart-ah No.7 a kai pha.
Grande sawi takah chuan a music video thar ber ‘We Can’t Be Friends (Wait for Your Love)’ pawh a tichhuah leh tawh a, he hla hi a album thar ‘Eternal Sunshine’ atanga a single niin, YouTube US Trending Music Videos chart-ah No.1 a ni mek.