Miami Open atangin Raducanu inhnukdawk

2021 US Open title a lak hnua hliamin a kiansan hleih theih tak loh Britain innghahna lian Emma Raducanu chu tunlai hian a kawng chung chiah hnungzang nain a tlakbuak leh tawh a, Miami Open atangin a inhnukdawk fel.
Ruahman ang chuan kum 21 mi hi nimin khan first round-ah Chinese Wang Xiyu nena intum tur an ni a, kumin chhunga a vawikhatna’na a chak zawn hmasakber Indian Wells lama lawm zo hlimhlawt a nih avangin United States tournament ngaihhlut dangah pawh hian engemawchen han thleng chho thei tura ngaih a nih laiin a comeback season chu hliam bawkin a tisukuk zui leh ta a ni!
Tarlan tawh thin angin, 2023 season kha Raducanu hian fitness buaipui reng rengin a hmang tluan a tih theih a, kuminah beiseiawm takin a kirleh a, karliamta mai khan a tih theih zen zen loh vawihnih chak zawn a puitlin hnuah Indian Wells third round lutin world number two leh two-time Australian Open winner ni bawk Aryna Sabalenka lakah a tlawm a; Miami lam a hawi leh mek laiin a heti leh ta a; tuntuma a hliam hi engtia serious nge a nih chiah hriat theih a nih rih loh avangin April 12-13 chhunga France hmachhawn tur Great Britain Billie Jean King Cup squad-ah a tel thei dawn em hriat phak a ni rih lo.
Hliamin a tihbuai sek avangin thlariat ngawt a chawl a, WTA ranking lamah pawh a tlahniam vawng vawng a, tunah hian wold number 288-na daih ni tawhin, a chawlh hnua a vawikhatna atan Indian Welss-ah khan match hnih a chak zawn tih chu a hlawhtlinna langsar ber a la ni rih!
Hetih lai hian a chipui rualkhat – Andy Murray, Cameron Norrie, Dan Evans, Jack Draper leh Katie Boulter-te chu Miami khaw tournament hmachhawn turin an inbuatsaih kal mek thung.
Florida tournament-a vawihnih champion ve tawh Murray chuan vawiin hian first round-ah Italian Matteo Berrettini a hmachhawn dawn a, a chak chuan second round-ah Argentine Tomas Martin Etcheverry a su zui leh ang.
Kum 22 mi Draper chuan Taro Daniel of Japan tumin, kum 33-a upa Evans chuan Italy player Lorenzo Sonego lakah fiahna hmasa a hmachhawn ang.
British number one ve ve Norrie leh Boulter chuan Zirtawpniah khelmual an lut dawn a; an pahnih hian 32 men’s and women’s seeded player an nih avangin first-round bye an hmu a ni.