A comeback match-ah Halep tlawm nghal

Damdawi hman phal loh a hmang tih manchhuah vanga kum li chhung hnawhchhuah Simona Halep chuan a chunga hremna a khinlet hnuah Court of Arbitration for Sport-in hremna chu thla kaw chhung atan a tihtawsak a, hremna a tuar zawh hnuah wild card hmangin Miami Open-ah a inlan a, Thawhlehni khan Paula Badosa chuan 1-6, 6-4, 6-3-in Romanian comeback hi dangbet.
Badosa hian a bialpa thih vanga lu sun mek Aryna Sabalenka a hmachhawn leh ang.
Thawhlehni khan Sabalenka bialpa, pro ice hockey player hlui Konstantin Koltsov thih thu puan a ni a, mahni intihluma ngaih a ni.
World number two Sabalenka hi Badosa thian tha tak niin, a bialpain a kalsan hnuah a hmachhawn leh tur Belarusian nen chuan vawi duai lo an inbia tih Spaniard Badosa chuan sawiin, a thiannuin hun khirh tak a hmachhawn laia khelmual chhunga inhmachhawn boruak chu a khirh hle dawn tih Halep a hneh hnuah a sawichhuak.
Kum 32 mi Simona Halep tan Thawhlehni inkhel kha 2022 US Open first round a paltlang zawh loh hnua inelna a hmachhawn leh vawikhatna niin, a chawlh rei avangin world number 80 Badosa lakah Halep a khawr deuh tih a hmuh theih a, grand slam title pahnih la ve tawh Romanian chuan first round a paltlang zo ta lo a ni.
Badosa tum leh tur Sabalenka chuan first round bye a hmu a, hun khirh takin tlakbuak mek mah se Thawhlehni khan inhnuhdawh tumna a nei lo tih social media kaltlangin a tarchhuak a, Hard Rock Stadium practice court ni sensa hnuaia inbuatsaihna a kalpui lai a tilang.
Sabalenka bialpa intihhlumna hi a bialnuin tournament a hmachhawn mekna Miami khawpui niin, Sabalenka hi a tawiawm niin a lang.
Miami-Dade police department chuan Thawhlehni khan mi pakhat inchung bathlar atanga tlahlum report an dawng a, he thihna thlenna hmun hi Miami resort a ni.
Police thuchhuah chuan Bal Harbour Police and Fire Rescue lamin tanpuina awm thei pe turin St. Regis Bal Harbour Resort an pan tih an tarlang a, Konstantin Koltsov-a intihhlum chungchang an chhuichiang mek tih leh he thihna chungchangah rinhlelh an la neih loh thu an thuchhuahah a lang bawk.
He thu buatsaih lai thleng hian Sabalenka chuan vantlang hriatah tawngkam a la cheh lo.