Solar plant bunna atana ram dilna hnuhkir an phut

Power & Electricity department-in khaw hrang hrang village council hnenah an solar power plant dinna atana an ram an dilna lehkha an tihchhuah tawh chu, solar power dinhmun an zirchian hnu ah thil tih chi ah an ngai lo tih Environment and Social Justice chuan sawiin, he lehkha hi hnukkir turin sawrkar an phut.
Environment humhalh kawnga hma latu pawl Environment and Social Justice (CESJ) chuan, public private partnership (PPP) mode-a solar power siam chhuah a, PPA (power purchase agreement) ziah belh chu tun dinhmunah power-a intodelhna kalkawng pawimawh ber ni loa an hria thu an sawi.
‘PPP mode-a power kan siam chhuahna leh siam tumna – Vankal, Tlungvel, Keifang, N.Vanlaiphai, Thenzawl leh hmalakna tura agreement awmsate hi enfel hmasak a tul a. Solar power hi chhunlamah chauh hman theih a nih avangin zan lama phai power kan lak a ngai reng tho a. Solar plant siambelh hian awmzia a nei tam lo thei,’ a ti.
PPP mode-a power siam chhuah a, sawrkarin a lei let leh tura inremna siam ang chi chu a man a sang a. India Power Market (Indian Energy Exchange Ltd) a a man ngai emaw a tlawm zawka leiin kan ram environment nasa takin kan humhalh nghal tih an sawi
Thingtlang VC-te hnena ram dil a, solar energy siam chhuah belh chu sawrkar ta (state owned) a nih chuan a tha a, heng atanga power siam hi unit 1-ah Rs.2 vela lei ang kan ni thei a; chuti ni loa PPP mode-a solar siam chhuah chuan a lei letnaah sawrkar a insen viau tho a ngai a, ram leilung a tihchhiat bakah lo leh huana neih tlak loh/ theih loh a siam nen a inhen lo tih an sawi a ni.
PPA sign sa, lei ngei ngei ngai kan neisa nual bawk nen, Mizoramin solar power leinaah phurh zawh loh leiba kan indelh tir dawn tihna a nih bakah department lamah budget indaih lohna (fiscal deficit) a thlen thei dawn tih an sawi bawk.
Thingtlang khuaa sawrkar project engemaw hmasawnna tur bun a nih dawnin, an khua leh a chhehvela sawrkar hmalakna awm tur chu an khaw tan hamthatna tak tak thlen tura ngaiin lawm takin an pawm thin a. Kum hnih thum hnuah an beisei anga thil a awm leh si lohin an lungawi lo leh fo tih CESJ hian a sawi.
‘Solar plant emaw thil dang pawh sawrkarin hmasawnna lam ruahmanna a neih dawn chuan, chinchang hre lo zawk an nih angin a nghawng theihte ziaka thlen bakah tawngka in awareness an nei tur a ni a. Khawtlang hruaitute pawhin sawrkar hmalakna an hriatpui tur a ni a, chu hmalakna (investment) chuan khawtlang tan hamthatna (profitable rate of return) a nei em tih an chik tur a ni a, mi nawlpui tana hlawkna thlen thei a nih dawn loh chuan an hnawl ngam tur a ni,’ a ti.
Inremnaah, solar plant dam hun chhung leh a thih hunah solar plate senghawi dan tur zawng zawng ziaka dah vek tur a ni. Solar-in power a dehchhuah hi electrical grid (electric kalkualna) ah a kual hmasa a, direct-in second khat pawh solar plant awmna khua hian an pawt theilo a ni tih pawh hrilhhriat tur a ni tih a sawi bawk.