MPSC thuamchak turin ngen nawn MZP-in MAH&VS lak ennawn ngen

Mizo Zirlai Pawl chuan Mizoram Public Service Commission thuamchak turin sawrkar an ngen nawn a. Tunhnaia junior grade of MAH&VS lak tur a rawt dan chu May 29 ralhmaa ennawn an phut tih an sawi bawk.
MZP president C Lalremruata chuan, junior grade of MAH&VS direct recruitment chungchangah post pali lak turah mi 74 exam an awm a, mi pathum chiah an tling a, midang 71-in written an paltlang loh chhanah MPSC online form/ portal ah Veterinary Council registration an upload loh vang niin MPSC lam chuan an sawi tih a sawi a ni.
Hemi chungchang MPSC an zawhfiah tumin controller of Examination chuan written exam an la neih loh thu a sawi lain an lo nei reng tawh tih an hre bawk a. MZP thudiklo a hrilh chu MPSC zahawmna a bo mai lohna turin thleng nawn tawh lo se an duh tih a sawi bawk.
MZP-in a zirchiannaah mi 71 reject/ disqualify hnen atangin MPSC form, online portal an fill up lai hian Veterinary Council registration certificate upload-na tur option/slot a awm loh thu leh online form-ah hian ‘others’ tih option pawh an fillup hunlai (i.e 11/09/2025- 10/10/2025 5:00 pm) hian a awm lo tih an hriart thu C Lalremruata hian a sawi a. MPSC website lamah technical problem a awm theih avang leh valid list tihchhuah tawh candidate zinga written exam hmachhawn mi 71 ten hetiang harsatna an tawk hi MPSC lam management fel tawk loh vangah MZP chuan a ngai a, candidate tihsual neilote tawrh tir tawh lo turin thuneitute an ngen tih a sawi a ni.
“MPSC thuneitute hian an thil tih dik tawk loah mawhphurhna la ngam a, he recruitment process zawng zawng hi May 29 hma ngeia a bul atanga tan that a nih theihnan hma la turin kan phut a ni,” a ti.
Tunhnaiah MPSC hian hna an lak danah tihsual an ngah tih MZP hruaitu hian sawiin, sawrkar thuneitute hnenah MPSC thuam chak tura vawi engemawzat an lo thlen tawh chung pawha MPSC-in full commission a la nei thei lo chu chingfel thuai turin sawrkar thuneitute an ngen tih a sawi bawk.