Germany ramah Kane thlawkkir

Zanin hian England chuan an captain inhliam Harry Kane tel loin Wembley friendly match-ah Belgium an mikhual dawn a, national squad atanga a inhnuhdawh hnuah England captain hi inenkawl chhunzawm turin Bayern Munich lamah a thlawkkir.
Kum 30 mi Kane hian Inrinni khan firendly match hmasaah Three Lions tan Wembley-ah Brazil a hmachhawn a, sikhat faia a team a tlawmpuina inkhela a kheimit a tihnat zui avangin Belgium a hmachhawn thei dawn ta lo a ni.
England all-time top goalscorer an chhawr zui theih loh tur thu boss Gareth Southgate chuan South American team an hneh loh hnu lawkah nemnghetin, “Thawhlehni atan Harry Kane a fit lo a, a club lamah a kir a ngai,” tiin.
England defender pahnih Kyle Walker leh Harry Maguire-te bakah back-up goalkeeper Sam Johnstone pawh Belgium hmachhawn thei lo tur zingah an tel.
Heti nuai hi a nih tak avangin England Under-21 team-a awm mek Burnley keeper James Trafford leh Manchester City defender Rico Lewis-te chu senior squad-ah hlan chhoh an ni.
Kum 21 mi Trafford hian nikum nipui lai khan England chu Euro Under-21 trophy a lakpui a, tun hi senior team atanga kohna a hmuh vawikhatna a ni.
Rawlthar kum 19 mi Lewis thung hian nikum November thla khan North Macedonia lakah a Three Lions debut a lo nghakchhuak tawh a ni.
A City team-mate Walker chu Inrinni Brazil game-ah khan first half-ah a inhliam a, Belgium lakah khelmual a lut thei dawn ta lo a ni.
Manchester United defender Maguire pawhin Wembley khelmualah khan right-back inhliam Walker thlakin captain banhren a hreng a, mahse, minute 67-ah thlak a ni ve leh.
Maguire, Walker leh Inrinnia inkhel ve ta lo Crystal Palace player Johnstone-te chu Harry Kane ang bawkin an club lam theuhah an kir fel ve tawh bawk a ni.