Sorkar chuan hlawhtling takin Popular Front of India (PFI) chu a khap tawh tia sawiin Home Minister Amit Shah chuan he pawl hian ‘radicalism leh sakhuana atchilh’ an kalpuia ‘firfiakna raw material siamtute’ an ni a, an laka chet muan chu ram pum tana pawi thei a ni tiin a sawi.
Shah chuan Congress te pawh sawisel zui telin PFI member-te thubuai tihtawpsak a tum a, mahse, court-in a dang a ni.
Inthlang mai tur Karnataka a tlawhnaah Shah chuan Congress te chu PFI issue chungchangah a bei a. Congress te chuan Union Home Minister chu Congress leh PFI te nena inthuruala sawi tumah an puh a.
“PFI hlawhtling takin kan khap a. PFI te hian radicalism leh sakhuana atchilh bak an buaipui lo. Firfiakna nasa zawk awm nan raw material an buaipui a ni. Document tam tak ram tana an hlauhawmna leh activity an neih te leh ram inlungrualna tichhe zawnga an chetlakna te a awm a ni” tiin Amit Shah chuan ANI tena an interview naah a sawi.
PFI leh Congress ten inzawmna an nei em tia zawhna chu Shah chuan Congress leh PFI te chu inang khat tia sawina a neih hauh lo thu in a chhang thung a.
“Ka sawi zawng chu PFI cadre te case hrang hrang a awm a, chung te chu Congress sorkar khan tihtawpsak a tum a, mahse court-in a dang a ni. Chu chu eng nge a makna viau? PFI te case tihtawpsak tumna chi a ni lo va. Keini chuan kan khap hmak a, vote bank politics kan hnawl a ni,” tia sawiin Amit Shah chuan a hma chuan PFI te chu South Karnataka leh Kerala tana harsatna siamtu tiin a sawi bawk.
“PFI te dan pawna kan hnawl hnu khan theihtawp chhuahin ram chhung hmun hrang hrangah inzarpharh an tum a. Agency ten information hrang hrang an dawn hnuah khauh zawkin kan kalpui a ni,” tiin a sawi. India sorkar chuan nikum September thla khan PFI leh an kaihhnawih tin te chu kum nga chhung atan Unlawful Activities (Prevention) Act hmangin an khap a ni.
-- Advertisement --
BJP ten thup tur nei lo, hlauh nei lo
Hindunberg-Adani controversy chungchangah opposition te chuan BJP sorkar chu an bei nasa hle a. Shah chuan Supreme Court-in a ngaihtuah mek a nih avangin atan sawi lo neih a rem lo tia sawiin mahse ‘BJP ten thup tur kan nei lo va, hlauh tur kan nei hek lo’ tiin a sawi.
“Supreme Court thuhnuaiah a awm tawh a. Minister ka nih angin Supreme Court thuhnuaia awm tawh a nih avangin sawi ka neih a rem ve tawh lo. Mahse, BJP te tan zep tur leh hlauh tur a awm lo,” tiin Shah chuan a sawi bawk.
Tun hnaia Lok Sabha-a Rahul Gandhi thusawi chungchangah Adani group te chu thlurbing bur an nih chungchangah Shah chuan Congress leader leh a script writer tena an ngaih pawimawh ang ang an sawi a ni mai a ti a. “A thusawi duh emaw a speech writer tena an duh ang a sawi a ni mai,” tiin Shah chuan a sawi a.
Rahul Gandhi-an ‘crony capitalism’ kalpuia BJP te a puhna chungchangah Shah chan, “Sawi buai tur a awm lo. Tute mahin BJP te hetiang thilah tun thlengin an la puh ngai lo. Congress rorel lai khan CAG emaw CBI emaw case registered a awm reng a, Rs 12 lakh crore scam te pawh a awm,” tiin a sawi bawk.