Hindu kulmukte pawlh dal turin NDA-a tel ve rih a ngai – K Vanlalvena

NDA chhunga BJP kulmuk hlangin ro an rel lohna atan leh a tul huna dodal turin Kristian MP-te an tel ve rih a ngai tih MP inthlan tura MNF candidate K Vanlalvena chuan a sawi.
Ningania Serchhip-a street campaign an neihah MNF candidate hian, NDA chu Congess leh an thurualpui party-te intelkhawmna UPA paihthla tura din a ni a, MNF pawh NDA dintu member zingah a tel tih a sawi. NDA chhunga BJP hmalakna avangin Kristianna a chep tih chu amah pawh a taka hretu a ni, tiin, “India ramah Hindu nationalism a lian zel a, chu chu BJP-in politics khelh nan an hmang a, hei hi NDA chhunga awm Kristian MP-ten na taka kan dodal zel a tul. BJP chak chho zelah a hlanga sawrkar siam theihna khawp MP an neih leh ngei hmel a, Hindu kulmuk hlangin ro an rel lohna turin Kristian MP-te tel ve rih a ngai. Tribal-te dikna leh chanvo humhalh turin NDA ah kan thu lui zel dawn zawk a ni,” a ti.
Rajya Sabhaah NDA thutna atangin Mizoram, Mizo hnam leh sakhua himna turin theihtawpin a lo au tawh thin tih sawiin, Manipur-a Kristian biak in 300 chuang hal a nih khan tum hnih Parliament-ah a auchhuak a. Congress MP rual, sakhaw zalenna intite zingah biak in hal a nih demna thu sawi chhuak ve tumah an awm lo tih a sawi. Myanmar atang raltlante thawnkir tura India sawrkarin thupek a chhuah dodal a, kan unaute an ni a, kan thawn kir dawn lo tia auchhuak pawh amah chiah a ni leh tih a sawi bawk.
“Kan ram, kan hnam leh kan sakhua-in nekna nasa tak a tawh mek karah Zoram mipui leh Zofate tan huai taka ding tlat turin mipui candidate ni tura pen chhuak ka ni,” K Vanlalvena hian a ti.
Mipui candidate tura inpe anih avangin Lok Sabha MP-a thlantlin a nih chuan Mizoram hmasawnna turin state sawrkar thuneitute nen pawh theihtawp chhuaha thawh ho a tum tih a sawi a. Rajya Sabha-a chhuahsan chuan ZPM-in Rajya Sabha MP an neih nghal dawn tho avangin, Mizoram, Mizo hnam leh Mizo sakhua humhim tura a hmalakna zau zawka a chhunzawm theih nan amah vote turin mipui a ngen tih a sawi a ni.