MKHC ngenna siamah lawm

Mizoram Kohhran Hruaitute Committee (MKHC) in Lok Sabha inthlanpui neih turah party tin, Zoram mipui hnena ngenna a siam chu lawmawm a tiin, mipuiin zawm theuh thei ila an duh tih MNF party chuan an sawi.
MNF Gen. Hqrs. thuchhuak chuan MKHC-in kan ram, kan hnam leh kan sakhua himna tur ngaihpawimawh bera an nei chu lawmawm a tih thu sawiin, ‘Kan thenawmte zingah abikin Assam nena kan inrina lama BJP kaihhruai sawrkarin min nek rengna do kawngah pawh huai taka dodal ngamtu sawrkar kalta kan neih angin, kan sawrkar neih mek pawhin hei hi chhunzawm zel ngam se kan duh a. An tha tichak tura BJP hmalakna do ngam MP kan neih zel a ngaiin, hemi kawnga a chet lak dan hmuhin Zoram mipui candidate Pu K Vanlalvena thlantlin ngei a nih pawh MNF chuan beiseina sang tak a nei a ni,’ a ti.
Kiltin atanga kan unaute neksawrna tawk mek, kan chipui kan rama damkhawchhuah beiseia tlulut, kan hum mekte dinhmun hrereng chunga MP huaisen kan thlanchhuah ngei a tul takzet tih MNF hian a sawi a. Central sawrkar duhdan pawh palzut ngam sawrkar kan neih tawh angin kan neih chhunzawm zel a tulin, ram chhung mipui, kan hnam himna tiderthawng zawnga central sawrkar chet lakna awm thei dodal ngam tur kan thlanchhuah thiam a pawimawh lehzualah an ngai tih a sawi.
‘India rama sakhaw lian zawk nihna changchawia a tezawkte nekchepna thleng mek dodal ngam MP, a bikin Kristianna humhim ngam tur, mitin tana chanchintha puanzar kawnga kan missionary-te thlavang hauha penchhuak ngam, Parliament House-a mahni sakhaw nihna lanchhuah chhunzawm tir ngam kan thlanchhuah a tul takzet a. MP candidate kan neih tha tak takte zingah a buzawla lo tal hrep tawh, kan sakhaw nihna a taka lantir ngam MP kan neih mek thlanchhuah mai hi thil finthlak takah kan ngai,’ thuchhuah hian a ti.