Polling station tlawh kual

Lok Sabha inthlanpui atana inbuatsaihna kal zelah Inrinni khan Siaha district election officer kaihruaiin VL Hruaizela Khiangte district thuneitute chuan Siaha khaw pawna polling station thenkhat an tlawh kual.
Noaotlah, Lobo leh Chhaolo khuaa polling station an tlawhnaah DEO chuan Member of District Council (MDC) inthlanah vote tla a tha thin hle a, MLA-ah tlemin a chhe deuh a, MP inthlanah vote tla a hniam fal thin hle, tiin, theihtawp chhuaha hma lak a tul tih a sawi. Block level officer (BLO) leh village council member-te chu theihtawp chhuahpui turin a sawm a, vote thlak ni hma ngeia khawtlang information kaltlanga vote thlak ngei tura mipui ngenna puangzar turin a chah.
Siaha District SP KL Vulmawia chuan inthlan felfai leh thianghlim tak awm turin Police department-in dan leh thupek an kengkawh mek tih a sawi a. Mipuiin ralmuang taka vote an thlak theihna’n hma lak a ni, tiin, Election Commission of India phut ang thlapin dan leh thupek an kengkawh dawn a, mipui pawhin theihtawpa tawiawm turin a ngen tih a sawi.
Polling station tlawh takte hi Noaotlah khuaa P/S-I vote 643 awmna, P/S-II vote 614 awmna, P/S III vote 187 awmna bakah Lobo P/S vote 709 awmna, Chhaolo-I P/S vote 730 awmna, Chhaolo-II P/S vote 200 awmna te an ni.