LADC-ah sawrkar din thuai beisei

Lai Autonomous District Council (LADC) a sawrkar siam thei an awm rih lo chungin, mipui sawrkar din thuai an inbeisei tih Lairam Democratic Progressive Alliance chuan an sawi.
LADC-a member nei political party thenkhat inzawmkhawmna – Lairam Democratic Progressive Alliance (LDPA) hian thuchhuah siamin, LADC term kallaia seat 25 awmnaah MNF-in seat 20 an la a, chief executive member (CEM) Manghmung Chinzah kaihhruai sawrkar din a ni a; MNF Legislature Party chhungah inphiarrukna a awm avangin sawrkar dinglai chu paihthlak a ni a, V Zirsanga kaihhruai MNF Legislature Party chuan sawrkar an din leh tih a sawi. LADC sum tihchingpen thubuaiah CEM V Zirsanga hi court-in thiam loh a chantir a, mipui zahna nen mahni inthiamlohna neia CEM atanga bang mai tura an beisei laiin a ban tak loh avangte, MNF party atanga hmalakna a awm loh avangte in party hrang hranga MDC 13 chuan CEM-in thlawptu a ngah tawk lo tih Mizoram larsap hnenah an thlen tih a sawi.
Hemi hnua LADC-a sawrkar lai rintawk lohna finfiah tura floor test neih tum a nih laiinm CEM hian banna a thehlut a, hetihlai vek hian LDPA lama MDC pakhat chu MNF Legislature Party lehlamah a pen leh tak vangin MDC 12 ve ve neiin sawrkar a ding thei ta loa, LADC thuneihna chu larsap-in a laksak ta tih a sawi a ni.
‘CEM hian a ban hma leh thlawptu member a ngah tawh lo chungin hna nghet 20 dawn lai a la a. Hun reiloteah sawrkar nghelnghet leh langtlang, mipui sawrkar a din theih ngei kan beisei,” LDPC thuchhuah chuan a ti.