Inter Club Badminton Championship

April ni 2, 2024 (Thawhlehni) atang hian Mizoram Badminton Association (MBA) buatsaihin Ramhlun Indoor Stadium-ah Yamaha MBA Inter Club Badminton Team Championship 2024 khelh tan a ni dawn.
Mizoram pum huap badminton club hrang hrangte inelna lian hi Yamaha, Thansanga & Sons-te sponsor niin, club hrang hrang 29 atangin team 88 zetin inelna an hmachhawn dawn a; he tournament hi April ni 6, 2024-ah a hmawr bawk a ni ang.
MBA Inter Club Championship 2024 hi Mizoram Badminton Association-in club hrang hrangte tan team hmanga inelna a buatsaih hmasak ber tur a ni.
Category pakua – he’ng Under-15 Boy’s & Girl’s team, Under-19 Boy’s & Girl’s team, Men’s team, Women’s team, 35+ Men’s team, 45+ Men’s team leh 55+ Men’s team-ahte inelna huaihawt a ni ang a; match hmasa lam hi YouTube lama live tur niin, quarter-final atangin LPS leh Zonet lamah live veka pekchhuah tum a ni bawk.
Junior category (U-15 leh U-19), Women’s team leh Masters category (35+ leh a chunglam)-ahte hian best of three hmanga inelna kalpui a ni ang a, Men’s team erawh chuan best of five an khel ang a, he category bikah hian team khatin singles vawithum leh doubles vawihnih an khel thei ang.
Yamaha MBA Inter Club Badminton Team Championship 2024 hi MBA-in tournament a siam tawh zinga lian ber leh match tamna ber tur pawl a ni a; team 88 atang hian player 300 chuangin hming pelutin, an inhnehtawk dan azirin match 200 atanga 250 chuang en tur a awm dawn a ni.