Miami Open hnehtu Danielle Collins

Inrinni women’s final-ah rinkai lo zawk American Danielle Collins chuan fourth seed Elena Rybakina laka straight sets hnehna changin a career-a a vawikhatna atan WTA 1,000 title a hlawhchhuak a, October 2022 hnu lama top five player a hneh leh vawikhatna a ni zui nghal bawk.
2024 season tawp ruala tennis inelna chawlhsan tum ve tawh Collins hian Kazakhstan chhuanvawr Rybakina lakah 7-5 6-3 hnehna changin, kum 30 mi tan a career-a title vawithum a lakna chiah a ni a, kum 2021 hnu lama tournament-a a champion leh vawikhatna a ni.
A home state Florida ngeia title hlu tak a sualchhuah hnuah Collins chuan champion turin a thawkrim tih a sawi a, stadium chhunga mipui zawng zawng tih theih deuh thawin an tan tlat kha danglam hlein a hria a, a lungnona pawh a kaichhuak hial tih a sawi.
Kum 2022 Wimbledon champion Rybakina meuh hnehtu world number 53 Collins hi kum 2005 champion Kim Clijsters tih loha unseeded player zinga Miami Open women’s champion ni leh thei hmasaber a ni a, vawiina WTA ranking thar tarchhuahah world number 22 a luah chho dawrh.
Kazakh Rybakina tan erawh result lungchhiatthlak niin, nikum final-ah pawh Petra Kvitova ngam loin a lo tlawm tawh a, kuminah beiseina sang zawk nen final a khel a, title chang lo zawng bawkin a tawp zui leh ta a ni.