Cricket Association of Mizoram (CAM) chuan 2024-2025 season atan Mizoram Women Under-19 probables team-a tel tur zawnna (open trial) a buatsaih dawn a, trial hi April ni 5, 2024 (Zirtawpni) chawhma dar 11-ah Mizoram Cricket Academy (MCA) Indoor, Ramhlun Sports Complex-a tan tur a ni.
Heta tel thei chin turte chu inlan vek turin CAM chuan sawmna a tichhuak.
Trial hmachhawn thei turte chu 1/9/2005 hnu lama piangte an ni tur a ni. Documents proof atan Birth Certificate digitalize emaw Aadhaar Card emaw ken tur a ni ang.
Cricket Association of Mizoram hian April ni 4-11, 2024 chhung hian Tlangnuam field-ah Junior Girls Triangular Series a buatsaih dawn bawk a; he tournament hi 40 overs-a khelh tur niin, sikul kal loh ni zelah match khelh thin a ni ang.
CAM hnuaiah vek hian Suaka Cricket Ground, Sihhmui lamah Khaled Memorial – Final Round (2nd Division Screening 2023-24) khelh mek a ni bawk.
Cricket Association of Mizoram hnuaia academy- te tana buatsaih Inter Academy Cricket Tournament pawh March ni 16 atang khan khelh tan niin, April ni 1, Thawhtanni khan final khelin a hmawr an bawk fel ta a; final-ah hian Ramhlun Venglai Cricket Academy chuan wicket 6-in Zemabawk Cricket Academy an hneh.
Final-a wicket hnih laa run 33 siamtu Immanuel Lalpekhlua chu man of the match-ah thlan a ni.
He tournament-ah hian academy 11 an inlan thei a, tournament hi over 50 (50 over format)-a khelh a ni.
Final hi ruahsur nghawng avangin over 25-a khelh a ni thung.
Ramhlun Sports Complex field-a zawh fel tak he tournament hi knockout system-a khelh a ni.
-- Advertisement --
Champion Team:
Ramhlun Venglai Cricket Academy
Runners up Team:
Zemabawk Cricket Academy
Player of the tournament:
Lalramluahpuia Zote, Zemabawk CA
Best batter:
Lalramluahpuia Zote, Zemabawk CA
Best bowler:
Lalrinchhunga, Zemabawk CA