Leverkusen-in title khawih pha thuak tawh!

Xabi Alonso hoa Bayern Munich rorelna rawn thiat chho mek Bayer 04 Leverkusen chuan Inrinni zanah sikhat faia mualneitu 1. FC Union Berlin hnehin, game ruk chiah khelh tur awm tawhah Bundesliga table-a an hmahruaina an sawhnghet leh sauh a, anmahni hnaihbertu leh champion lai ni bawk Bayern lakah point 16 ngawtin an sang tawh.
He inkhela goal awmchhun hi first half hun pekbelh penalty atanga Florian Wirtz chhuihluh niin, ni li chhunga a goal thumna a ni tawh a, Leverkusen-in kar liamta laihawl German Cup semi-final match-a Fortuna Dusseldorf an hneh tum khan goal hnih a lo thawh tawh bawk a ni.
Inrinni inkhel dangah an title chuhpui thei tur hnaivai ber Bayern chu sihnih faia hma an hruai hnuah table laihawl luahtu Heidenheim mualah 3-2-in an tlawm a, kartawpa Werder Bremen an mikhual hunah hian point thum an hmuh leh theih chuan an club chanchina an Bundesliga title hmasaber an hlawhchhuak thei tawh dawn a ni.
Leverkusen hian treble champion nih theihna chance pawh nei tel mekin, karliamta khan sili faia Fortuna Dusseldorf sawp chungin German Cup final an lut dfel tawh a; Ningani Europa League quarter-final first leg-a in West Ham United luhkhung turin an inbuatsaih zui leh mek a ni.