Khawvela pa upa ber John Tinniswood

Kar liamta khan khawvela mipa damlai zinga upa ber Venezuelan Juan Vicente Perez Mora chu kum 114 mi ni a a thih tak avangin Guinness World Record chuan khawvela mipa damlai zinga upa berah sap pachal John Tinniswood an puang thar ve leh ta. John hi kum 111 a upa niin, 1912 khan England hmarlam Merseyside-a puang a ni.
John Tinniswood chuan a damreina chu ‘vanneih vang’-ah a puh ber a, a ei leh inah te an damrei pui tur bik riau engmah a awm lo niin a sawi a, a chaw duh ber chu sangha leh chips a ni.
Eizawnna lamah accountant leh poster service worker te pawh a lo ni tawh thin a, tunah chuan a hna atanga a chawlhna pawh kum 50 vel zet a ni ve tawh. Zirtawpni kaltaa Guinness World Record-in khawvela mipa damlai zinga upa bera an puan hian kum 111 leh ni 222 a upa a ni.
A damreina chhan ni a an hriat an zawh chuan, “Ka damrei leh rei loah hian tih theih em em kan nei pawhin ka hre lo,” a ti.
Tuna Guinness World Records-in khawvela upa bera a puan lai chu Spanish Maria Branyas Morera, kum 117 a ni.
Chhinchhiah theih china khawvela mipa piang tawh zinga la damrei ber chu Japanese Jiroemon Kimura niin, kum 116 leh ni 54 a dam a, hmeichhe lama dam rei leh, chhinchhiah theih china mihring damrei ber chu French Jeanne Louise Calment niin, kum 122 leh ni 164 a dam a, France chhimlam, Arles-a nursing home-ah August ni 4, 1997 khan a thi.