Future, Metro Boomin & Kendrick Lamar ‘Like That’-in duhtu a la ngah ber

Future, Metro Boomin & Kendrick Lamar ‘Like That’-in duhtu a la ngah ber
Future, Metro Boomin leh Kendrick Lamar te hla ‘Like That’ chu kar khat chhunga US-a hla lar ber niin, Billboard Hot 100 (singles) chart-ah a No.1, he chart-a kar hnih a No.1-na a ni ta. Hetihrual hian Beyonce album thar ‘Cowboy Carter’ atanga hla pathum chu chart top 10-ah a lang thei bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Like That’ hian stream maktaduai 46.1 leh sales 6,000 nei lehin, radio airplay-ah pawh ngaithlatu maktaduai 10.1 a la nei thei a, hei hi chart-ah a No.1 pui leh ta a ni. He hla hi Future leh Metro Boomin te album intawm ‘We Don’t Trust You’ atanga an single a ni.
Beyonce album tar ‘Cowboy Carter’ atanga hla pathum chu Hot 100 chart top 10-ah a lang thei a, chart No.1 hlui ‘Texas Hold ‘Em’ chu radio airplay maktaduai 47.9, stream maktaduai 26.9 leh sales 15,000 tlingin No.11 atangin No.2 a kai thar leh ta.
He album atanga hla dang pahnih ‘II Most Wanted’ featuring Miley Cyrus chuan stream maktaduai 25.2 nei phain No.6-ah a debut a, Dolly Parton hla Jolene a cover chuan stream maktaduai 22.4 neiin, No.7-ah a debut thei bawk.
Tihian Beyonce hla Hot 100 chart top 10-a lang thei 24 a awm ta a (Destiny’s Child angin 1998-2005 inkarah top 10 a lang thei hla 10 an nei tawh bawk), Miley pawhin top 10-a lang thei hla 13 a nei tling ve ta bawk.
Billboard Hot 100 chart top 10 a lang thei hla ngah ber chu Drake niin, hla 77 a nei a, Taylor Swift (49), Madonna (38), The Beatles (35), Rihanna (32), Michael Jackson (30), Elton John (29), Mariah Carey (28), Stevie Wonder (28), Janet Jackson (27), Justin Bieber (26), Lil Wayne (25), Elvis Presley (25), Whitney Houston (23), Paul McCartney (23), The Rolling Stones (23) ten an dawt.
Beyonce hian Whitney Houston lehpelin, hmeichhe zaithiam zingah he chart-a top 10 kai thei hla ngah lamah parukna a ni ta a ni.
Benson Boone ‘Beautiful Things’-in radio airplay-ah ngaithlatu maktaduai 50.5 la nei theiin, No.3-ah bawk a la awm a, Hozier ‘Too Sweet’ pawhin stream maktaduai 31.8 la nei theiin, No.5 atangin No.4-ah a insawna, Teddy Swims ‘Lose Control’ chu No.4 atangin No.5-ah a tawlh a, chart No.1 hlui Jack Harlow ‘Lovin on Me’ chu No.7 atangin No.8-ah a tawlh ta bawk.
Chart No.1 hlui Ariana Grande ‘We Can’t Be Friends (Wait for Your Love)’ chu No.10 atangin No.9 a kai thar leh a, Future, Metro Boomin, Travis Scott leh Playboi Carti ‘Type Shit’ chu No.2 atangin No.10-ah a tawlh ve thung.