Kan dikna palzut sak kan nih chuan hma sawn a nuam loang – Lalbiakzama

Eng ang pawhin hma sawn mah ila, kan dikna chanvo palzut sak kan nih a, thlamuang taka Pathian kan biak theih loh chuan a nuam dawn chuang lo tih Congress MP candidate Lalbiakzama chuan a sawi.
Thuthar thehdarhtute a kawmnaah India ram hmun hrang hranga thil thlen dan leh Prime minister leh Union Home minister thil tih duh leh tih duh loh, an tawng chhuah duh leh duh loh danah, BJP leh a sangawizawn puite rorelna hnuaiah kan ram kan hnam leh kan sakhua hian a him lo takzet tih rinhlelh rual lohin a lang tih Lalbiakzama hian a sawi a.
India ram innghahna thulaibu tih nghinin a awm a, kan ram danpui leh democracy pawh palzut mek niin, hnamtinin zalen tak leh indawhtawn chunga kan sakhua theuh thlamuang taka kan biak theihna leh, hlauhna tel loa kan rinna kan tlangaupui theihna ram, kan hnam dan theuh inzahtawn sak chunga kan chen hona ram chuan chhan a ngai ta tih a sawi bawk.
“Hnam tlem leh ualau taka kan sakhua min cheksawlh saktute hi India rama an lal zel loh nan tan kan lak a ngai a. BJP leh a thurualpuite paihthla theitu chu India ramin zalenna a neih tirha ram danpui duangtu Indian National Congress leh a thurualpuite chauh hi an ni. An kut tichak tur leh kan ram kan hnam kan sakhua him zelna turin MP inthlanpuiah hian rilru fim tak nen mitinin vote thlak turin ka ngen a ni,” Lalbiakzama hian a ti.
Zawhna chhangin INC MP candidate chuan sawrkarah nihna a chelh chhungin central atanga thu rawn kal zawng zawng zawm diak diak a that loh bakah a tul loa, khauh chin neih chang a nei fo tih a sawi a. Assam nena kan ramri buai tihfel thuai chu Mizoram tan a tul tih sawiin, state pahnih tanna ve ve ah inlai tan theih dan a awm a ring tih a sawi. Thalaite an smart tawh avangin hruaia kaih an ngai loa, remchanna siamsak chiah a ngai tih a sawi. “MIFCO ang chi te pawh, thalai entrepreneur rual kutah dah se, sapthei leh lahuihtheih hi pakhatmah kan tih tawih ka ring lo,” a ti.