State sorkar nen lungrual taka thawk thei awmchhun ka ni – Richard Vanlalhmangaiha

MP candidate zingah amah chu Mizoram sawrkar nen lungrual taka thawk thei tur awmchhun a ni tih ZPM MP candidate Richard Vanlalhmangaiha chuan a sawi.
Nilainia MP inthlan campaign kharnaah ZPM candidate hian, kan ram politics-a dik lo taka inbeihna awm thin chu tun hnu zelah awm tawh lo se, amahah tawp hmak se a duh tih a sawi a. Criminal complaint a thehluhah khan a mimal takin tumah huat a nei lo tih a sawi. Vote thlak chu mitin mawhphurhna a nih angin MP inthlanah vote thlak vek turin mipui a sawm tih a sawi bawk.
Thusawitu dang chief minister Lalduhoma chuan April 1 atangin anmahni pual budget an nei tan a, budget pumpui atangin zaa 57 development atan an dah thei tih a sawi.
Sawrkar kalta khan Reserve Bank of India balance-ah cheng vaibelchhe minus (-) 389 a hnutchhiah a, hei hi an bul tanna a ni a. April 1-a budget an neih chiahin cheng vbch. plus (+) 520 in bul an tan thei a, hei hi achievement ropui tak ni ah an ngai, tiin a sawi.
Ni 100 programme an duan chu minister-ten an ti zo thei vek tih a sawi a. “Thil tha nia kan hriat hi kan ti a, a tha lo kha kan ti lo mai a, chu chu a formula chu a ni mai,” Lalduhoma hian a ti.
MNF chungchang sawiin, pawn lama inhrosa vak thin, Parliament chhunga NDA thlawp leh zel si thin an ni tih ZPM hruaitu hian a sawi. “ZPM chungah chuan Pathian tih chauh lo chu roreltu dang kan nei ve lo a. Tualto party kan ni chungin central sawrkarah engmah harsatna kan nei ve lo,” a ti.