Raltlan enkawlna vangin lawmthu sawina sum hlan

Chin Baptist Association of North America (CBANA) Hqrs. Indianapolis, Indiana USA chuan School Education minister Dr Vanlalthlana an hmu a. Mizoram sawrkarin Myanmar atanga Zohnahthlak raltlante tha taka a lo dawnsawn avanga lawmthu sawina, a tul apianga hman atan sumfai US dollar 10000.00 (India pawisa in nuai 8.5) an hlan.
CBANA hruaitute chuan Myanmar tualchhung buaina avangin Zohnahthlak cheng thahnem takin sahimnan Mizorama an unaute an bel a. Ram leh ram inkara sahimna zawng ni mah se, ram danin document a phut thinte Mizoram sawrkarin phut loa thlamuang taka an lo enkawl avangin an lawm a, an lawmna lantir nan sumfai hi pe tih an sawi a ni.
Minister chuan thisena inzawm kan ni a, ramriin min daidan chauh a ni, tiin, “Thisena inzawm, unau kan nih avangin mihring siamchawp ramri hian min thenhrang tak tak thei lo. Hei hi Mizoram sawrkar pawhin a hria a, sawrkar hmasa khan kan inunauna hi tha takin a lo kalpui a, keini pawhin kalpui chhunzawm zel tha kan ti a ni,” a ti.
CBANA aiawhin general secretary Rev Dr Biak Lian Thang, vice president Rev Reuben No Bual Hrang leh Ministers Council chairman Rev Kap Lian Thang an tel a ni.