Mizorama BJP-in missionary hna kan thawk – Vanlalhmuaka

Mizoramah BJP chuan missionary hna an thawk a, kan hnathawh danah central lamin Krista hmel an hmuh a ngai tih State BJP president Vanlalhmuaka chuan a sawi.
Thawhtannia BJP State office ah political session-ah Vanlalhmuaka chuan Mizorama BJP chu missionary hna thawk an ni tih an inhriat a ngai a, Mizoram Kristian ram kan intih ang hian kan hnathawhnaah, sawrkar hna kan thawhnaah kan rinawm a ngai a, Pathian thu chu sawi niloin kan nunah a lang tur a ni, tiin, “Central hruaitute khuan keimah ni atanga Krista hmel hmuh an duh hle a, nimahse kan hnathawh result atang hian kan nihna dik tak an hmu thin thung. Politics hi Pathian rawngbawlna a ni tih kan hriat a, ram rawngbawlna kalkawng a ni tih kan chian a ngai,” a ti.
MP inthlanah an party member thahnemngai taka thawktute avangin hnehna an chan ngei a rinawm tih BJP MP candidate ni bawk hian a sawi a. India ram hmundangah inthlan kalpui mek a la ni a, chu’ngah chuan INDI-Alliance pawhin inhamtan hram tumin hma an la ve a, an thil tum erawh result-in a rawn hailang dawn tih a sawi. BJP leh a thawhpuite chuan party dang sawichhiat ngawr ngawr hi an thupui a ni ve loa, Congress leh a thawhpui INDI-Alliance tihdan ang lo takin, dawt hmangin emaw party dang chhiatna lai khei vak chu an tihdan a ni ve ngai lo tih a sawi. “Mitinin an mamawh ang hmasawnna an hmuh hi kan tum a ni a, kan manifesto neihte mipui tan malsawmna a nih theih nan tihhlawhtlin tumin hma kan la mai thin zawk a ni,” a ti.