Hmeichhe MLA tharte lawmpui

2023 Mizoram MLA inthlanpuia tling hmeichhe pathum chu All Mizoram Women Federation chuan Thawhlehni khan Aizawlah an chawimawi.
Mizoram State Social Welfare Board-in kum 2011-a a din All Mizoram Women Federation (AMWF) hian hmeichhe MLA tling pathum – Lalrinpuii (Lunglei East), Baryl Vanneihsangi (Aizawl South-III) leh Provo Chakma (West Tuipui) te lawmpuina an hlan rual hian AMWF chanchin inhrilhna atan leh International Women’s Day 2024 thupui “Invest in women: Accelerate progress” zirhona atan an hmang a ni.
AMWF president Prof. Lalneihzovi sawi danin, an pawl hi Mizorama cheng hmeichhia zawng zawng huapzo ni tura din a ni a. Women NGO engemawzat awmin thawk tha em em mah se, state puma hmeichhia zawng zawng huam thei an ni tawk lo vek a. Hnam tam leh lian zawka hmeichhiate leh hnam tlem leh te zawka hmeichhiate thawhhona tur siam chu an din chhan pakhat a ni.
Mizorama hnam hrang hrang chengte huapzo ni tura din niin, intanpuia intichak tawn a, state chhung leh pawna Mizoram hmeichhiate tana sawt tur ruahmanna siama an hlawkpui theiha sengluh leh, hmeichhe pawl hranghrang leh hnambil puala hmeichhe pawl dingte karah inlaichinna tha siam tura ding an ni tih a sawi a. Hemi anga hma an lak tawhna a sawi bawk.
“AMWF hian hmeichhe pawl awm tawh sa tu amah a do loa, a tibuai bawk tur ani loa. Thawhho theih dan tur kawng a zawnpui zawk thin. Mizorama hnam hrang hrang hmeichhiate hian nunho leh thawhho leh indawm tawna intihchak tawn kan thiam chuan hmeichhe dinhmun hi a lo ziaawmin hma kan sawn tlang thei ngei dawn a ni,” Prof. Lalneihzovi hian a ti.