Resource Mobilization lam ngaihtuahtute thukhawm

Mizoram Resource Mobilization Committee chu Nilaini khan an chairman, chief minister Lalduhoma hoin an thukhawm a. Sub-Committee an neih pali zinga pathum – Sub-Committee on Enhancement of Tax & Non Tax Revenues, Sub-Committee on Economy Measures leh Sub-Committee on Convergence, Manpower Assesment, Administrative Reforms etc. rawtna lo lut an thlirho. An rawtna MRMC-in a pawmpuite chu a kal zelna tur hmunah kaltir an ni anga, chak taka umzui a ni ang.
Mizoram sawrkar sum dinhmun a lo that deuh deuh theih nan, sawrkar inrelbawl dan felfai zawk kan neih theih nan, sawrkar hnathawkte mumal leh rualkhai zawka semdarh an nih theih nan MRMC chuan a zirchiang chho zel a. Rawtna tangkai tak tak a nei nual tawh tih sawi a ni.