Excise & Narcotics hotute thukhawm

Excise & Narcotics Department senior officer-te chu thla thum dana an inhmuhkhawm thin angin Ningani khan an commissioner Z Lalhmangaiha kaihhruaiin Aizawlah an thukhawm.
Hmanpuitu Excise & Narcotics secretary Lalramsanga Sailo chuan an department-in zu leh ruihhlo man chungchangah leh website enkawlna lamah hma a sawn zel a, MP inthlan laia Election Commission duhdan anga tha taka hma an lak avangin lawmawm a tih thu a sawi. Department-in resource a neihsa hman tangkai lehzual a, tun aia awmze nei zawka thawk turin a fuih a. A bikin online surveillance lamah hma sawn a tul tih a sawi.
“Excise & Narcotics Department thawktute chuan midang aiin ram kan hmangaih zual bik a ngai a, chutiangin mipui pawhin min hriat dan hi a dik leh a tha zawng a nih zel theihna’n tan lak a pawimawh” a ti.