Udinese manager thar Cannavaro

Kum 2006 daih tawha defender ni chunga Ballon d’Or chawimawina dawng thei hnuhnungber ni mek Italy international hlui Fabio Cannavaro chu tun season la bang zawng Udinese enkawl tura lakluh a ni.
Italy captain ni chunga 2006 World Cup chawitu Cannavaro hian talbuai Verona laka sikhat faia Udinese an tlawm zawha petchhuah tawk ta Gabriele Cioffi hmunruak luahin, kha result hnu khan Udinese chu Serie A table-ah 17-na an ni duai tawh a, an hnuai chiaha relegation zone pawnlang bera tang mek Frosinone nen point 28 ve ve neiin, an dinhmun hi a him lo hle a ni.
Parma, Juventus, Inter Milan leh Real Madrid player hlui Cannavaro hian nizan khan a club thar chu a vawikhatna’n khelmualah a kilkawi a, mahse, minute 18 chhung chiah a team thar a khelhpui!
Hei hian chhan a nei a, AS Roma leh Udinese inkhel hun tawp hnaih lama 1-1 a nih laiin Roma player Evan Ndicka chu kartawp inkhelah khan lung tha lo vangin khelmualah a tlu a, inkhel tihtawp zui nghal a ni. Kha mi tuma min ute la bang 18 kha Ningani zanah khelh chhunzawmin, Cannavaro hian a club thar hi a kilkawi rei hman ta lo a ni.
Ivory Coast defender tlu khan damdawi in a chhuahsan tawh a, Roma thuchhuah chuan an player kum 24 mi nat dan sawiin, khelmualah khan a awm chhung na a ti a, heart attack erawh a ni lo hlauh tih an tarlang.
A tlak rualpuite zinga centre-back tha ber pawl tling pha Cannavaro hian kum 2011-ah inkhelh bansanin Asia khawmualpuiah coaching lam a luhchilh nghal a; China leh Saudi Arabia ram club-te a enkawl tawh bakah Benevento boss ni tura an ram lama a kir hma kum 2019 khan chawlhkar ruk lek chhung Chinese national team a hrual.