Muga silk-a hma lak dan zir

April 22- 26 chhung khan MJA Serchhip District member 11 chuan Assam leh Meghalaya-ah Sericulture Press Tour an nei a. Zirtawpni khan Mizoramah lo letin chief minister Lalduhoma chu a office-ah kawmin an zinnaa an thil hmuh leh hriatte an hrilh.
MJA Serchhip District hian sericulture hmalak hlawhtlinna hmun hrang – Fabric Plus Gauhati Chenglang Bongaigaon, Bodoland Silk Park Kokrajhar, Bhaoragwja Eri Cluster leh Central Silk Board MESSO, P3 Unit Nongpoh te an tlawh a. Bodo Territorial Region Sericulture director Chakraborty leh retired director Dr Jogesh Deori ten lo dawngsawngin, an hmalakna an lo fanpui a, Mizoram sericulture hmasawnna’n an theihna zawna puih an inhuam reng tih an lo hrilh.
Muga silk pangang khawituten harsatna an neih thin, Muga pangang tui duh hun a awm lo thin sutkianna turin Central Silk Board-in Mizoramah office thar, Muga P3 Unit a dahna tura mi pawimawh, MESSO director Dr Kartig Neog, Central Silk Board Khanapara Assam leh Central Silk Board scientist dangte nen an inkawm bawk.
Muga P3 Unit kalphung zirchiangin Meghalaya Nongpoh-a Muga P3 Unit an tlawh bawk a. Scientist ‘C’ Dr Abishek leh staff dang pathum lek hmanga hnehsawh taka unit an kalpui dan leh farmer-te tana Muga P3 Unit a tangkai dan pawh an zir nghal tih an sawi. ‘Bodo mipui nuai 10 vel zingah 42500-in pangang khawi an hman tangkai dan kan hmu a, Mizoram tan pawh hman tangkai theih ngei kan beisei,’ Serchhip MJA hian an ti.