Zirlaite leh Pension kum

Sawrkar laipui lamah sawrkar hnathawkte thawh theih hun chhung ‘retirement age’ tihsan rawtna thawm chuan Mizoramah pawh vung thar chhuah vein, Mizorama sawrkar hnathawk inzawmkhawm pawl (FMGE&W) chuan pension kum chu 60 atanga 62-a tihsan ve sawrkarah an phut a. Hei hi zirlai pawl pahnih MZP leh MSU chuan an duh loh thu an auchhuahpui ve thung a.
MZP chuan, ‘thalai hna zawng mek leh hna nei lo lehkhathiam tam tak an awm mek lai a, sawrkar hnathawk pension kum tihsan hi inhmeh kan ti lo’ tiin dan dinglai anga kal rih chu tha an tih thu an sawi a. MSU lam pawhin, Mizoram sum dinhmun leh thalaite hna hmuhna kawnga harsatna thleng thei ngaihtuahin FMGE&W thil phut chu a tawp thlenga dodal an tum thu an sawi ve bawk a.
Zirlai pawl pahnihte hian sawrkar hnathawk pension tawh rawih nawn tha an tih loh thu leh an dodal thu pawh tunhma atang tawhin an lo auchhuahpui tawh thin a; tun hnaia pension ruai nawn tura file kal mekte pawh a tul anga umzui zel an tum thu an sawi nghe nghe a nih kha.
Kan state dinhmun hi a hrechiang tur ber chu sawrkar hnathawkte leh ram hruaitute hi an ni a. Ram hruaitu kan tihte hi chu ‘politician’ an ni a, a changa thuneihna chang a, a changa thuneihna chang lo leh mai thin, thuneihna an chan hun chhung pawh kum nga, an tihfuh chuan kum 10 te a ni a; Mizoramah hi chuan a zawna kum 10 chhung rorel thei hi an la awm lo. Politician-te ai chuan sawrkar hnathawk (bureaucrats) ho hian state dinhmun diktak chu an hrechiang zawk awm e. State dinhmun han tih hian, state-in a thawhchhuah tam leh tlem dan te, leiba kan neih dan te, sum leh pai kan hmuh dan leh kan hmanral dan te, kan indaihloh dan leh harsatna hrang hrang hi an hrechiang hle.
Sawrkar hnathawk lo zawk zirlai pawlte hian ram leh hnam hnuk thil hi an vei thuk zawk em ni tih turin, tuna pension kum tihpun rawtna chungchangah pawh, an duh loh chhanah, sum indaihlohna avanga Mizoram dinmuna harsatna thlen dan an tlawhchhan thei a. Kum tina thalai lehkhathiam rual pung chho reng si, hna thawh tur vang tulh tulh bawk si nen, pension kum hi tihtlem ni se tih an duh ngawih ngawih laia a tipung tur zawnga hmalakna lo awm ta hi, zirlaite tan chuan thalaite hmakhua ‘tlawhpinna’ ang hiala ngaih theih a ni awm e.