Nagaland sumdawnna hmun te khar

Nagaland a sumdawngten Naga political group hovin pawisa an khawn (extortion) nasa lutuk duh lova tiamchin nei lova sumdawnna hmun an khar chuan harsatna nasa tak siamin thenawm Assam ah pawh nitin mamawh lei turin mipui an intlar phah a. Pathianni kha lungawilohna lantira sumdawnna hmun an khar ni thumna a ni tawh.
Dimapur Chamber of Commerce and Industries (DCCI) huaihawta nawrhna kalpui hian sorkar pawh demin Dimapur a sumdawng te humhim thei lovah an puh a, Dimapur hi Nagalan-a sumdawnna hmunpui ber a ni.
Confederation of Nagaland Chamber of Commerce and Industries (CNCCI) pawhin an thlawp thu sawiin state pumah sumdawnna hmun khar a ni avangin Assam nena inrina bul hnaia cheng te chuan Assam ah nitin mamawh an la nasa hle a ni.
Confederation of Nagaland Chamber of Commerce and Industries (CNCCI) te chuan tiamchin awm lova lungawilohna lantir chu Thawhtanah mipui mamawh nawlpui chakkhai te lamna hun zing dar 6 atangin darkar ruk chauh an hawng dawn tiin an sawi bawk.
CNCCI president Khekugha Muru chuan mipuite hnena hriattir lawkna district hrang hrangah an pek that tawk loh avangin mipui tawrhna nasa lutuk chhawk nan sumdawnna hawn zuai tum tih a sawi a ni.
CNCCI chuan sorkar chu sum intuk leh inchhuhsak luih tam lutuk leh hel pawl tena an vau reng bawk si laka an him theih nan hmala turin an ngen bawk a.
State Home COmmissioner Vikeyie Kenya chuan police te chu hetiang chetna a awm hian dan kengkawhtute bakah state sorkar a nghawng nat theih avangin khauh taka chet la turin a ti a ni.
Ditrict administration tin leh police te chu Ceasefire Monitoring Group-in ceasefire ground rules a siam te bawhchhiatna a awm leh awm loh enfiah tur leh mipui sum dil leh chhuhlui, underground cadres an awm a nih chuan National Security Act hmanga man turin a ti bawk.
Inrinni khan DCCI te chuan state sorkar hnenah Dimapur deputy commissioner kaltlangin five-point charter of demand an thehlut a. DCCI chuan state sorkar chu a rang thei ang bera NPGs ten chhiah an khawn chu dan kalh a ni nge ni lo sawifiah turin an ti a. Chutihrual chuan sumdawngte hian NPGs te hnena chhiah an pek atangin GST pek a ni dawn em tih sawichiang nghal turin an ti a ni.
DCCI chuan sorkar chu sumdawngte NPG office, camp leh monitoring cell ten an koh thin chu dan kalh a ni a, chutiang thil a thlen chuan law enforcing agency te hmalakna tur a ni an ti.
DCCI chuan sum khawn luih, inrukbo leh transport tihbuaite chu dan anga rang taka chingfel nghal zel turin an ti bawk.