Lirthei thar 30000 chuang, chhiah pe lo 8000 chuang

Lirthei a pung thur thur a, financial year liam taah pawh khan Mizoramah lirthei 30000 chuang a awm. Chutih rual chuan chhiah pe lo pawh an awm nual a, lirthei 8000 chuangin chhiah an pe lo.
Transport department chhinchhiah danin, financial year liam ta 2023-24 (2023 April ni 1 atanga 2024 March ni 31) chhung khan Mizoramah lirthei thar 30266 a awm.
2023-24 chhunga an ziahluh lirthei hi chi hrang hrang 25 a ni a, two wheeler a tam lawr lak; lirthei thar 30266 zinga 21204 chu motor cycle/scooter a ni.
Lithei dang chu 9062 a ni chauh a, two wheeler tih lohvah a tam ber chu car niin, car thar 5056 a awm.
Two wheeler leh car ni lo lirthei chi dang chu a tlem ta rawih a, a tam leh ber chu bungraw phurhna goods carrier 1973 a awm.
2023-24 chhung hian lirthei atangin chhiah Rs 5238,52,792 an hmu a, an hmuh tura bituk (target) chu Rs 5000,00,000 niin, Rs 238,52,790-in hei hi an khum a ni. A hma kum 2022-23 chhung khan chhiah hi Rs 4903,46,058 an hmu a, a kum lehah chhiah atanga sum hmuh hi Rs 335,06,734-in a pung.
Chhiah hi an hmu tha tiin a sawi theih a, target an khumna pawh a sang tiin a sawi theih ang. Mahse chhiah pe lo pawh an thahnem a, 2023-24 chhung khan lirthei chhiah pe lo 8540 vel an awm.