Aizawl district-ah vawk lakluh khap

Aizawl district hmun thenkhatah vawk hri – African Swine Fever (ASF) a len mek avangin he hri laka mipui himna atan district magistrate chuan inkhuahkhirhna thupek a chhuah.
CrPC 1973 Section 144-in thuneihna a pek angin, Aizawl district huamchhunga mipui zawm turin, ram dang (foreign) atanga vawk, vawksa leh vawksa atanga siam eitur chi reng reng lakluh khap a ni a. State dang leh district dang atangin vawk, vawksa leh vawksa atanga siam eitur reng reng lakluh khap a ni.
Vawk damlo talh leh hralh khap a ni a. Vawk damlo chu dahhran thuai tura tih a ni. Vawk thi thuk taka phum bo tur a nih bakah vawk damlo leh thi an awmin AH & Vety official-te hnena hriattir thuai turin a ti.
Aizawl district chhung khua leh khua emaw veng leh veng emawa vawk inlakpawh tawn tur reng rengin vawk hrisel tha ngei a ni tih hriatpuina AH & Vety department hnena lak tur a ni a. Aizawl hmun thenkhat ‘infected area’ a puante atangin vawk lakluh leh lakchhuah khap a ni bawk.
AH & Vety director atanga phalna neite tan ASF hri len lohna state atangin vawksa atanga thil siam (frozen pork) lakluh phal a ni a. Standard operating procedure erawh zawm ngei tur niin, APEDA emaw FSSAI-in a pawmpui firm an ni bawk tur a ni, tih a ni.
Thupek hian thu leh awm hma chu puan a nih atanga thla hnih chhung a huam a. Zawm lo te chu IPC Section 188 hmanga hrem theih an ni dawn tih a sawi.