MIS officer tharte district-ah inzir

District Information & Public Relations office-a hnathawh dan leh inrelbawl dan kalhmang zirchiangin Mizoram Information Service (MIS) 2024 batch-te chuan ‘District Office Orientation Program’ neiin Kolasib, Lunglei leh Champhai district an tlawh dawn a. Nilaini khan Kolasib DIPRO office tlawhin Kolasib district-a hnathawh dan hrang hrang chu Kolasib DIPRO Dr Hmingthanzuala hoin an inhrilh.
MIS tharte hi district bawrhsap John LT Sanga chuan a lo kawm a. Tunlai khawvel thiamna thang zelah ‘information’ rintlak lakkhawm leh pekchhuah pawimawh zia sawiin, a hun takah a dawng tur tak ten information an dawn thin chuan harsatna, buaina leh inhriatthiam lohna thleng thei a ven phah thin tih a sawi. Information officer-te chu sawrkar tha tichak tura thawktu pawimawh tak a ni, tiin, mipui leh sawrkar inkara inlaichinna tha siamtu hmanraw tangkai tak an ni bawk a. An thiamna leh theihna chu thahnemngaihna nen ram tana hmang zel turin a duh tih a sawi a ni.
Thutkhawmah hian Kolasib SDO (Sadar) Christina Lalmuanzuali chuan Deputy Commissioners’ office hnathawh dan hrang hrang sawiin, DIPRO office nen a thawhhona tha neih a pawimawh zia a sawi a ni.
DIPRO office-a hna hrang hrang kalpui a nih dan, advertisement rules leh documentation chungchangah Kolasib DIPRO hian an hriat tur hrilhin, technical equipment hrang hrang hman dan entir a nih bakah School of Nursing Thingdawl tlawhpui an ni a. Vawiin hian training hi Kolasibah an neih chhunzawm ang.